ໃນຕອນເຊົ້າຂອງວັນທີ 28 ທັນວາ 2020 ສູນຢັ້ງຢື້ນມາດຕະຖານ ແລະ ກວດກາຄຸນນະພາບແຫ່ງຊາດ, ກົມມາດຕະຖານ ແລະ ວັດແທກ ລົງຕິດຕາມກວດກາ ແລະ ເກັບຕົວຢ່າງນໍ້າສີຂອງບໍລິສັດ ອຸໄລພານິດ (ປະເທດລາວ) ຕັ້ງຢູ່ທີ່ບ້ານ ສົມສະໜຸກ ເມືອງຫາດຊາຍຟອງ ນະຄອນຫຼວງວຽງຈັນ. ໂດຍໄດ້ມີການປະສານສົມທົບກັບພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງ ຮ່ວມກັບ ຄະນະກຳມະການເຕັກນິກແຫ່ງຊາດດ້ານຜະລິດຕະພັນວັດສະດຸກໍ່ສ້າງ .
ເພື່ອປະຕິບັດຕາມລະບຽບການໃນການຕໍ່ໃບອະນຸຍາດນຳໃຊ້ກາໝາຍມາດຕະຖານແຫ່ງຊາດລາວ ຫຼື (ມລ) ເນື່ອງຈາກຄົບຕາມສັນຍາໃນໄລຍະອານຸຍາດ3ປີຜ່ານມາ ທັງເປັນການເກັບກໍາສະພາບການ ແລະ ຊຸກຍູ້, ປັບປຸງຄຸນນະພາບຜະລິດຕະພັນສີ ຂອງບໍລິສັດອຸໄລພານິດ (ປະເທດລາວ) ເພື່ອຍົກສູງໃຫ້ສິນຄ້າທີ່ຜະລິດ ແລະ ຈໍາໜ່າຍຢູ່ໃນ ສປປລາວ ເປັນສິນຄ້າທີໄດ້ມາດຕະຖານ ຮັບປະກັນດ້ານຄຸນນະພາບ ກ້າວໄປທຽບເທົ່າລະດັບສາກົນ ໃຫ້ເປັນທີ່ຍອມຮັບທົ່ວສັງຄົມ.
ໃນການເຮັດວຽກຕົວຈິງເບື້ອງຕົ້ນທາງຄະນະກຳມະການກໍ່ໄດ້ກວດກາທາງດ້ານເອກະສານທີ່ກ່ຽວຂ້ອງ ແລະ ໄດ້ລົງຕິດຕາມກວດກາເບີ່ງຂະບວນການຜະລິດຕົວຈີງທຸກຂັ້ນຕອນພ້ອມທັງປະເມີນຕາມຕົວຈິງ ຫຼັ້ງຈາກນັ້ນ ກໍ່ໄດ້ເຮັດການສຸ່ມເກັບເອົາຕົວຢ່າງແຕ່ລະປະເພດມາກວດສອບຢູ່ຫ້ອງທົດລອງເພື່ອປະເມີນຜົນດ້ານຄຸນນະພາບໂດຍທຽບໃສ່ກັບມາດຕະຖານແຫ່ງຊາດ, ເພື່ອເປັນບ່ອນອິງໃສ່ການຄົ້ນຄວ້າ ແລະ ພິຈາລະນາໃນການຕໍ່ໃບອານຸຍາດນໍາໃຊ້ກາໝາຍມາດຕະຖານແຫ່ງຊາດ ໃຫ້ແກ່ບໍລິສັດດັ່ງກ່າວ.
ເຊີ່ງໃນຕອນບ່າຍຂອງວັນດຽວກັນ ທາງຄະນະກຳມະການກໍ່ໄດ້ສືບຕໍ່ລົງເຮັດວຽກຢູ່ທີ່ບໍລິສັດນະຄອນຫຼວງອຸດສາຫະກໍາເຫຼັກ ຈໍາກັດ ໂດຍໃນການການລົງມາເຮັດວຽກຮ່ວມກັບບໍລິສັດໃນຄັ້ງນີ້ກໍ່ເພື່ອຕິດຕາມຄືນປະຈຳປີ ເປັນປີທີ2 ເພື່ອປະຕິບັດຕາມລະບຽບສັນຍາອະນຸຍາດນຳໃຊ້ກາໝາຍມາດຕະຖານແຫ່ງຊາດ ເຊີ່ງມີອາຍຸການນຳໃຊ້ 3 ປີ. ບໍລິສັດຕັ້ງຢູ່ທີ່ ບ້ານ ຊຽງຄວນ ເມືອງຫາດຊາຍຟອງ ນະຄອນຫຼວງວຽງຈັນ.
ທາງຄະນະກຳມະການໄດ້ດຳເນີນຈັດຕັ້ງປະຕິບັດຕາມຂັ້ນຕອນແຜນວຽກ ໂດຍເນັ້ນໃສ່ການກວດກາດ້ານເອກະສານທີ່ກ່ຽວຂ້ອງຄືນ ໂດຍສະເພາະບາງບັນຫາທີ່ຍັງຄົງຄ້າງໃນການກວດກາໃນຄັ້ງກ່ອນແມ່ນເຫັນວ່າທາງບໍລິສັດແມ່ນໄດ້ປັບປຸງແກ້ໄຂສຳເລັດເປັນສ່ວນໃຫຍ່ ພ້ອມທັງຕິດຕາມກວດກາຂັ້ນຕອນການຜະລິດຕົວຈິງ ແລະ ສຸ່ມເກັບເອົາຕົວຢ່າງເຫຼັ້ກເສັ້ນແຕ່ລະຂະໜາດຕາມທີ່ທາງບໍລິສັດຂໍອະນຸຍາດນຳໃຊ້ກາໝາຍມາດຕະຖານແຫ່ງຊາດ ເພື່ອນຳມາເຂົ້າຫ້ອງທົດລອງຕາມຂະບວນການຂອງທາງຄະນະກຳມະການເຕັກນິກແຫ່ງຊາດດ້ານຜະລິດຕະພັນວັດສະດຸກໍ່ສ້າງເພື່ອສົມທຽບໃສ່ມາດຕະຖານແຫ່ງຊາດທີ່ໄດ້ຮັບຮອງ ເພື່ອຮັບປະກັນດ້ານຄຸນນະພາບຂອງຂະບວນການຜະລິດ ແລະ ຮັກສາຄຸນນະພາບຂອງຜະລິດຕະພັນສິນຄ້າຂອງບໍລິສັດໃຫ້ຢູ່ໃນເກນມາດຕະຖານແຫ່ງຊາດ ຢ່າງຖືກຕ້ອງ ແລະ ຊັດເຈນ.
ບໍລິສັດ ອຸໄລພານິດ (ປະເທດລາວ)
ບໍລິສັດນະຄອນຫຼວງອຸດສາຫະກໍາເຫຼັກ ຈໍາກັດ
ຮູບພາບ ແລະ ບົດຂ່າວ: ທ ພຸດທະຈັນ ຊັບທະວີ
