ໃນຕອນບ່າຍວັນທີ 23 ມັງກອນ 2021 ກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ໄດ້ມີພິທີປະກາດການອະນຸມັດໃຫ້ລັດຖະກອນພັກການຮັບອຸດໜູນບຳນານ ໃຫ້ກຽດເຂົ້້າຮ່ວມເປັນປະທານຮ່ວມຂອງທ່ານວຽງທອງ ວົງທະວິໄລ ເລຂາໜ່ວຍພັກກົມມາດຕະຖານ ແລະ ວັດແທກ, ທ່ານ ມະໂນທອງ ວົງລໍຄຳ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງວິທະຍາສາດ ແລະ ເຕັກໂນໂລຊີ ພ້ອມດ້ວຍຫົວໜ້າພະແນກ, ຫົວໜ້າສູນ, ຮອງຫົວໜ້າພະແນກ, ຮອງຫົວໜ້າສູນ ແລະ ພະນັກງານພາຍໃນກົມເຂົ້າຮ່ວມ ໃນໂອກາດດັ່ງກ່າວ ທ່ານ ນ. ມະນີຈັນ ຈູມພະຈັນ ຫົວໜ້າພະແນກນະໂຍບາຍ ໄດ້ຂື້້ນຜ່ານຂໍ້ຕົກລົງຂອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ສະບັບເລກທີ 1378/ກວຕ, ລົງວັນທີ 6 ພະຈິກ 2020 ວ່າດ້ວຍການອະນຸມັດໃຫ້ລັດຖະກອນພັກການຮັບອຸດໜູນບຳນານ ໂດຍໄດ້ອະນຸມັດໃຫ້ທ່ານ ສົມພູ ພອນວິໄລສັກ ຫົວໜ້າພະແນກຄົ້ນຄວ້າ ແລະ ພັດທະນາ ກົມມາດຕະຖານ ແລະ ວັດແທກ ພັກການຮັບອຸດໜູນບຳນານ ນັບແຕ່ວັນທີ 1 ມັງກອນ 2021 ເປັນຕົ້ນໄປ.
ຈາກນັ້ນ ທ່ານສົມພູ ພອນວິໄລສັກ ກໍ່ໄດ້ສະແດງຄວາມຂອບໃຈນຳພັກລັດ, ການຈັດຕັ້ງ ແລະ ໝູ່ເພື່ອນຮ່ວມງານທຸກທ່ານໃນໄລຍະທີ່ຜ່ານໄດ້ຊ່ວຍເຫຼືອກໍ່ສ້າງອຳນວຍຄວາມສະດວກໃຫ້ໄດ້ເຄື່ອນໄຫວຕາມພາລະບົດບາດ ແລະ ມີຜົນສຳເລັດໃນຮອບດ້ານ.
ຕອນທ້າຍປະທານໄດ້ມີຄຳເຫັນ ກ່ອນອື່ນທ່ານໄດ້ສະແດງການຍ້ອງຍໍຊົມເຊີຍຕໍ່ທ່ານທີ່ໄດ້ອອກພັກການຮັບອຸດໜູນບຳນານເຊິ່ງທ່ານລ້ວນແຕ່ເປັນຜູ້ທີ່ມີຄວາມຮູ້, ຄວາມສາມາດ, ມີປະສົບການ ມີຜົນສຳເລັດໃນການຂຽນບັນດານິຕິກຳຕ່າງໆໄດ້ຫຼາຍສະບັບ, ເປັນຜູ້ຫ້າວຫັນຝຶກຝົນຫຼໍ່ຫຼອມຕົນເອງໃຫ້ເຕີບໃຫ່ຍເຂັ້ມແຂງເປັນແຕ່ລະບາດກ້າວ ແລະ ໄດ້ຮັບການໄວ້ເນື້ອເຊື່ອໃຈຈາກໝູ່ຄູ່ ແລະ ການຈັດຕັ້ງເປັນຢ່າງດີ.
ບົດຂ່າວ ແລະ ຮູບພາບ: ສູນຂໍ້ມູນຂ່າວສານວຽກງານມາດຕະຖານ ແລະ ວັດແທກ
