ກອງປະຊຸມປຶກສາຫາລື ແລະ ແລກປ່ຽນບົດຮຽນກ່ຽວກັບການຄຸ້ມຄອງວຽກງານວັດແທກ ລະຫວ່າງ ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ແລະ ກົມການຄ້າພາຍໃນ, ກະຊວງພານິດ ແຫ່ງ ຣາຊະອານາຈັກໄທ.

ໃນລະຫວ່າງວັນທີ 20–21 ສິງຫາ 2026, ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ແຫ່ງ ສປປ ລາວ ໄດ້ຮ່ວມກັບ ກົມການຄ້າພາຍໃນ, ກະຊວງພານິດ ແຫ່ງ ຣາຊະອານາຈັກໄທຈັດກອງປະຊຸມປຶກສາຫາລື ແລະ ແລກປ່ຽນບົດຮຽນກ່ຽວກັບການຄຸ້ມຄອງວຽກງານວັດແທກ.
ກອງປະຊຸມຄັ້ງນີ້ສຸມໃສ່ 3 ຫົວຂໍ້ຫຼັກທີ່ສຳຄັນ:
ການບັງຄັບໃຊ້ນິຕິກຳ ແລະ ກົດໝາຍ: ຖອດຖອນບົດຮຽນຕົວຈິງໃນການຄຸ້ມຄອງເຄື່ອງມືວັດແທກ ເພື່ອປົກປ້ອງສິດຜົນປະໂຫຍດ ແລະ ສ້າງຄວາມເປັນທຳໃຫ້ແກ່ຜູ້ບໍລິໂພກ.
ການຖ່າຍໂອນວຽກງານກວດສອບ (Outsource): ສຶກສາຮູບແບບການດຶງເອົາພາກສ່ວນພາຍນອກເຂົ້າມາຊ່ວຍກວດທຽບອຸປະກອນວັດແທກ ແທນການນຳໃຊ້ເຈົ້າໜ້າທີ່ລັດຢ່າງດຽວ ເພື່ອເພີ່ມຄວາມວ່ອງໄວ ແລະ ປະສິດທິພາບ.
ມາດຕະຖານຫົວຈ່າຍນ້ຳມັນ: ແລກປ່ຽນບົດຮຽນການຈັດຕັ້ງປະຕິບັດໂຄງການຫົວຈ່າຍປ້ຳນ້ຳມັນມາດຕະຖານ (Fuel Dispenser Verified) ເພື່ອສ້າງຄວາມເຊື່ອໝັ້ນໃຫ້ປະຊາຊົນໃນການຊົມໃຊ້ນ້ຳມັນເຊື້ອໄຟ.
ຄຽງຄູ່ກັນນັ້ນ, ຄະນະຜູ້ແທນທັງສອງຝ່າຍຍັງໄດ້ລົງຢ້ຽມຢາມຕົວຈິງ ພ້ອມທັງຈັດຝຶກອົບຮົມກ່ຽວກັບ ລະບົບການຢັ້ງຢືນສິນຄ້າຫຸ້ມຫໍ່ ໃຫ້ແກ່ພະນັກງານກົມມາດຕະຖານ ແລະ ວັດແທກ ລວມເຖິງພະນັກງານ ບໍລິສັດ ເບຍລາວ ຈຳກັດ ເພື່ອສ້າງຄວາມເຂົ້າໃຈຢ່າງເລິກເຊິ່ງກ່ຽວກັບ ຂໍ້ກຳນົດ, ເງື່ອນໄຂ, ຂັ້ນຕອນ ແລະ ລະບົບການຢັ້ງຢືນເຄື່ອງໝາຍປະລິມານສິນຄ້າຫຸ້ມຫໍ່ລະຫວ່າງ ສປປ ລາວ ແລະ ຣາຊະອານາຈັກໄທ ໃຫ້ສອດຄ່ອງກັນ.