ກົມມາດຕະຖານ ແລະ ວັດແທກ ຈັດກອງປະຊຸມປຶກສາຫາລືກ່ຽວກັບ ແຜນພັດທະນາພຶ້ນຖານໂຄງລ່າງດ້ານຄຸນນະພາບແຫ່ງຊາດ (National Quality Infrastructure) ໃນວັນທີ 17ກໍລະກົດ 2026
ໃນວັນທີ 17 ກໍລະກົດ 2026 ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ໄດ້ຮ່ວມຈັດກອງປະຊຸມປຶກສາຫາລືກ່ຽວກັບແຜນພັດທະນາພຶ້ນຖານໂຄງລ່າງດ້ານຄຸນນະພາບແຫ່ງຊາດ (National Quality Infrastructure). ໃຫ້ກຽດເປັນປະທານກ່າວເປີດກອງປະຊຸມໂດຍ ທ່ານ ສີສັງຄົມ ໂຄດໂຍທາ ຫົວໜ້າ ກົມມາດຕະຖານ ແລະ ວັດແທກ, ກະຊວງອຸດສະຫະກຳ ແລະ ການຄ້າ, ພ້ອມດ້ວຍການເປັນປະທານຮ່ວມໂດຍ ທ່ານ ແຄັສໂຊ ກຣີຊັນ (Mr. Cashel Gleeson)ທ່ານອຸປະທູດ ສະຖານທູດອັງກິດປະຈຳລາວ ແລະ ທ່ານ ກຣາແຮມ ຣັດແຊວ ເອັມບີອີ (Mr. Graham Russell MBE), ຫົວໜ້າຫ້ອງການມາດຕະຖານ ແລະ ຄວາມປອດໄພ ຜະລິດຕະພັນ ແຫ່ງປະເທດອັງກິດ(OPSS-BSI) ຜູ້ເຂົ້າຮ່ວມຈາກທັງພາກລັດ ແລະ ເອກະຊົນທີ່ກ່ຽວຂ້ອງ.
ກອງປະຊຸມໃນຄັ້ງນີ້ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ໃນນາມເປັນຂະແຫນງການທີ່ຮັບຜິດຊອບຈັດຕັ້ງປະຕິບັດແຜນງານການພັດທະນາວຽກງານມາດຕະຖານ ແລະ ຄຸນນະພາບ ພາຍໃຕ້ຄະນະກຳມະທິການທີ່ປຶກສາດ້ານມາດຕະຖານ ແລະ ຄຸນນະພາບອາຊຽນ (ACCSQ) ໃນແຜນງານການເຊື່ອມຈອດປະຊາຄົມເສດຖະກິດອາຊຽນ ໂດຍໄດ້ຮັບການສະຫນັບສະຫນູນຈາກກອບການຮ່ວມມື ASEAN-UK Economic intergration programme (EIP) ຕາມແຜນງານຂອງ ( Regulatory Reform Pillar-Standards and National Quality Infrastructur workstream) ທີ່ໄດ້ມີການຮ່ວມມືກັບຊ່ຽວຊານ ຫ້ອງການ ມາດຕະຖານ ແລະ ຄວາມປອດໄພ ຜະລິດຕະພັນ ແຫ່ງປະເທດອັງກິດ (OPSS-BSI) ໃນການສ້າງແຜນພັດທະນາພື້ນຖານໂຄງລ່າງດ້ານຄຸນນະພາບແຫ່ງຊາດ ແນໃສ່ສ້າງຄວາມເຂັ້ມແຂງໃຫ້ແກ່ວຽກງານມາດຕະຖານ, ການວັດແທກ, ການຮັບຮອງ ແລະ ການປະເມີນຄວາມສອດຄ່ອງ ເຊິ່ງມີຄວາມກ່ຽວພັນກັບຫລາຍຂົງເຂດວຽກງານ ເປັນຕົ້ນແມ່ນ: ພະລັງງານທົດແທນ, ເຄມີ-ອຸດສາຫະກຳ, ວິສະວະກໍາ-ການກໍ່ສ້າງ, ຄົມມະນາຄົມ, ກະສິກຳ-ປ່າໄມ້, ການທ່ອງທຽວ-ການບໍລິການ ແລະ ວິທະຍາສາດເຕັກໂນໂລຊີ ດ້ວຍຄວາມກ່ຽວພັນຈຶ່ງມີຄວາມຈໍາເປັນຕ້ອງໄດ້ມີການສ້າງແຜນວຽກ ພ້ອມທັງສ້າງກົນໄກການປະສານສົມທົບ ແລະ ຈັດຕັ້ງປະຕິບັດວຽກງານດ້ວຍຄວາມເປັນເອກະພາບກັນ.
ເປົ້າໝາຍສຳຄັນໃນການພັດທະນາວຽກງານພື້ນຖານໂຄງລ່າງຄຸນນະພາບແຫ່ງຊາດ ແມ່ນເພື່ອເປັນການເອື້ອອຳນວຍວຽກງານເສົາຄ້ຳເສດຖະກິດທັນສະໄໝຂອງລັດຖະບານ ເນື່ອງຈາກວຽກງານດັ່ງກ່າວໄດ້ກວມເອົາການປະເມີນຄວາມສອດຄ່ອງເຊິ່ງມີບົດບາດສູງໃນການຮັບປະກັນຄຸນນະພາບ, ຄວາມປອດໄພ ແລະ ຄວາມເຊື່ອໝັ້ນ ບໍ່ພຽງແຕ່ເປັນຂໍ້ກຳນົດທາງດ້ານລະບຽບການເຕັກນິກເທົ່ານັ້ນ ແຕ່ຍັງເປັນປັດໄຈສໍາຄັນຂອງວຽກງານການອໍານວຍຄວາມສະດວກທາງດ້ານການຄ້າ, ການເຂົ້າເຖິງຕະຫຼາດ ແລະ ການພັດທະນາແບບຍືນຍົງອີກດ້ວຍ.
ສຳລັບ ສປປ ລາວ ການສ້າງພື້ນຖານໂຄງລ່າງຄຸນນະພາບແຫ່ງຊາດແມ່ນເປັນບູລິມະສິດແຫ່ງຊາດ ທີ່ພວກເຮົາໄດ້ເອົາໃຈໃສ່ຢ່າງຕັ້ງໜ້າໂດຍສະເພາະແມ່ນລະບົບ ການຢັ້ງຢືນ, ການຮັບຮອງ, ການກວດກາ, ແລະ ການທົດສອບ ເພື່ອໃຫ້ສອດຄ່ອງກັບມາດຕະຖານສາກົນ ແລະ ອຳນວຍຄວາມສະດວກໃນການຫັນປ່ຽນເສດຖະກິດຂອງພວກເຮົາ ພ້ອມທັງເພີ່ມທະວີການແຂ່ງຂັນດ້ານການຄ້າ, ການປົກປ້ອງຜູ້ຊົມໃຊ້, ການຮັກສາສິ່ງແວດລ້ອມ ແລະ ຮັບປະກັນຄວາມໜັ້ນຄົງຂອງຊາດ.
ທັງໝົດທີ່ກ່າວມານີ້ ແມ່ນການສັງລວມເອົາບັນດາຈຸດປະສົງ ແລະ ເນື້ອໃນແຜນການສ້າງພື້ນຖານໂຄງລ່າງຄຸນນະພາບແຫ່ງຊາດ ຂອງ ສປປ ລາວ ພ້ອມທັງວຽກງານອື່ນທີ່ກ່ຽວຂ້ອງ ແລະ ກອງປະຊຸມໄດ້ປິດລົງໃນຕອນແລງຂອງວັນດຽວກັນ.
