ຮັບເອົາມະຫາຊົນກ້າວໜ້າເຂົ້າ ເປັນສະມາຊິກພັກສຳຮອງ ແລະ ເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກສົມບູນ

ໃນພິທີດັ່ງກ່າວ, ສະຫາຍ ສຸມານະ ຈຸລາມະນີ, ຄະນະພັກກະຊວງ, ເລຂາໜ່ວຍພັກ ກົມເຕັກໂນໂລຊີ ແລະ ນະວັດຕະກຳ ໄດ້ຂຶ້ນຜ່ານມະຕິຕົກລົງຂອງອົງຄະນະພັກກະຊວງ ວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ຈຳນວນ 3 ສະຫາຍ ຍິງ 2 ສະຫາຍ. ຫຼັງຈາກນັ້ນ, ບັນດາສະຫາຍເລຂາໜ່ວຍພັກທັງ 6 ໜ່ວຍພັກ ໄດ້ຂຶ້ນຜ່ານມະຕິຕົກລົງ ຂອງຄະນະພັກ ກວຕ ວ່າດ້ວຍການເຫັນດີອະນຸມັດເລື່ອນ ສະມາຊິກພັກສຳຮອງ ຂຶ້ນເປັນສະມາຊິກສົມບູນ ຈຳນວນ 21 ສະຫາຍ, ຍິງ 10 ສະຫາຍ ໃນນັ້ນມີໜ່ວຍພັກຫ້ອງການ 1 ສະຫາຍ, ໜ່ວຍພັກກົມມາດຕະຖານ ແລະ ວັດແທກ 5 ສະຫາຍ ຍິງ 2 ສະຫາຍ, ໜ່ວຍພັກ ກົມກວດກາ 4 ສະຫາຍ ຍິງ 1 ສະຫາຍ, ໜ່ວຍພັກ ສະຖາບັນພະລັງງານທົດແທນ ແລະ ວັດສະດຸໃໝ່ 4 ສະຫາຍ ຍິງ 2 ສະຫາຍ, ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ 3 ສະຫາຍ ຍິງ 2 ສະຫາຍ ແລະ ໜ່ວຍພັກ ກົມເຕັກໂນໂລຊີ ແລະ ນະວັດຕະກຳ 4 ສະຫາຍ ຍິງ 3 ສະຫາຍ ຊຶ່ງລ້ວນແລ້ວແຕ່ເປັນຜູ້ທີ່ມີຄວາມຫ້າວຫັນໃນການປະຕິບັດໜ້າທີ່ວຽກງານ, ມີທັດສະນະຫຼັກໝັ້ນທາງດ້ານການເມືອງແນວຄິດ, ມີຄວາມສາມັກຄີ, ຕັ້ງໜ້າຝຶກຝົນຫຼໍ່ຫຼອມຕົນເອງປະກອບສ່ວນເຂົ້າໃນວຽກງານ, ມີເງື່ອນໄຂຖືກຕ້ອງຄົບມາດຖານ ແລະ ເງຶ່ອນໄຂຂອງການເປັນສະມາຊິກພັກປະຊາຊົນປະຕິວັດລາວ.
ໃນໂອກາດດັ່ງກ່າວ, ສະຫາຍ ເລຂາຄະນະພັກ ກວຕ ກໍໄດ້ໃຫ້ກຽດໂອ້ລົມ ແລະ ໃຫ້ຄຳໂອວາດຊຶ່ງສະຫາຍໄດ້ສະແດງຄວາມຊົມເຊີຍຕໍ່ສະມາຊິກພັກໃນຄັ້ງນີ້ ແລະ ສະແດງຄວາມຍິນດີຮັບເອົາທັງໝົດບັນດາສະຫາຍເຂົ້າເປັນສະມາ ຊິກພັກສົມບູນ ຂອງພັກປະຊາຊົນປະຕິວັດລາວ. ສະຫາຍຍັງໄດ້ໃຫ້ຄຳເຫັນຕໍ່ສະມາຊິກພັກທັງເກົ່າ ແລະ ໃໝ່ ຈົ່ງເພີ່ມທະວີຄວາມຮັບຜິດຊອບຕໍ່ໜ້າວຽກຂອງຕົນ, ມີສະຕິຕໍ່ການຈັດຕັ້ງສູງ, ຢຶດໝັ້ນ ແລະ ເປັນເອກະພາບຕໍ່ແນວທາງນະໂຍ ບາຍຂອງພັກ-ລັດ, ປະກອບສ່ວນຄວາມຮູ້ ຄວາມສາມາດຂອງຕົນ ເຂົ້າໃນວຽກງານທີ່ການຈັດຕັ້ງມອບໝາຍໃຫ້, ສືບຕໍ່ຍົກລະດັບຄວາມຮູ້ຄວາມສາມາດຂອງຕົນ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ ເວົ້າລວມ, ເວົ້າສະເພາະແມ່ນ ວຽກງານວິທະຍາສາດ ແລະ ເຕັກໂນໂລຊີ ໃຫ້ນັບມື້ນັບຈະເລີນກ້າວໜ້າ.
ເຂົ້າຮ່ວມຮ່ວມໃນພິທີຄັ້ງນີ້ ມີສະຫາຍໃນຄະນະພັກກະຊວງ, ບັນດາເລຂາ, ຮອງເລຂາໜ່ວຍພັກຂອງຫ້ອງການ, ບັນດາກົມ, ສະຖາບັນອ້ອມຂ້າງກະຊວງ, 3 ອົງການຈັດຕັ້ງມະຫາຊົນ ແລະ ສະມາຊິກພັກພາກສ່ວນທີ່ກ່ຽວຂ້ອງ.