ໃນຕອນບ່າຍຂອງວັນທີ 10 ມິຖຸນາ 2020 ນີ້ ຖືເປັນກາລະໂອກາດດີ ຊື່ງສະຫາຍເລຂາຄະນະບໍລິຫານງານຊາວໜຸ່ມ ກວຕ ໄດ້ລົງພົບປະຢ້ຽມຢາມ ໜ່ວຍຊາວໜຸ່ມຮາກຖານ ກມວ ເພື່ອເປັນການສ້າງຂະບວນການໃນການຂຳນັບຮັບຕ້ອນກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງວິທະຍາສາດ ແລະ ເຕັກໂນໂລຊີ ທັງເປັນການພົບປະແລກປ່ຽນຄຳຄິດເຫັນຢ່າງໃກ້ຊິດລະຫວ່າງສະຫາຍເລຂາ ແລະ ສະມາຊິກຊາວໜຸ່ມຂອງ ກມວ
ໃນໂອກາດການພົບປະຢ້ຽມຢາມດັ່ງກ່າວ ສະຫາຍ ເລຂາຄະນະບໍລິຫານງານຊາວໜຸ່ມ ກວຕ ແລະ ສະມາຊິກທັງໝົດທີ່ເຂົ້າຮ່ວມ ໄດ້ຮັບຟັງ ການຂື້ນຜ່ານບົດສະຫຼຸບລາຍງານການເມືອງ ຈາກສະຫາຍ ເລຂາໜ່ວຍຊາວໜຸ່ມຮາກຖານ ກມວ ກ່ຽວກັບສະພາບລວມການເຄື່ອນໄຫວໃນໄລຍະຜ່ານມາ, ການຕີລາຄາການຈັດຕັ້ງປະຕິບັດວຽກງານດ້ານດີ, ດ້ານອ່ອນ ບົດຮຽນທີ່ຖອດຖອນໄດ້ ແລະ ຮັບຟັງທິດທາງແຜນການໃນຕໍ່ໜ້າໃນການເຄື່ອນໄຫວຂອງໜ່ວຍຊາວໜຸ່ມຮາກຖານ ກມວ ຫຼັງຈາກນັ້ນສະຫາຍເລຂາຄະນະບໍລິຫານງານຊາວໜຸ່ມ ກວຕ ໄດ້ເປີດໂອກາດໃຫ້ບັນດາສະມາຊິກທຸກສະຫາຍ ສະເໜີປະກອບຄຳຄິດເຫັນຕໍ່ບົດລາຍງານດັ່ງກ່າວ ທັງເປັນການຝຶກຝົນໃຫ້ແກ່ສະມາຊິກໃນການສະແດງຄວາມກ້າຫານໃນການກ້າທີ່ຈະປະກອບຄຳເຫັນໃນທີ່ປະຊຸມເພື່ອສ້າງໃຫ້ສະມາຊິກທຸກສະຫາຍກາຍເປັນຊາວໜຸ່ມທີ່ມີຄວາມຫ້າວຫັນກະຕືລືລົ້ນກ້າຄິດກ້າສະແດງອອກບົນພື້ນຖານຄວາມຖືກຕ້ອງ ແລະ ຢູ່ໃນລະບຽບການ ຊື່ງບັນດາສະຫາຍສະມາຊິກກໍ່ພ້ອມກັນໃຫ້ຄວາມຮ່ວມມືປະກອບສ່ວນສະແດງຄວາມຄິດເຫັນໃນຫຼາຍບັນຫາ ເປັນຕົ້ນແມ່ນການສະເໜີໃຫ້ມີການສ້າງຂະບວນການແຂ່ງຂັນຜົນງານຫົວຄິດປະດິດສ້າງດ້ານວິທະຍາສາດລະຫ່ວາງຊາວໜຸ່ມ ກວຕ, ການຝຶກອົບຮົມຄວາມຮູ້ດ້ານພາສາຕ່າງປະເທດ, ການສ້າງກິດຈະກຳເພື່ອສັງຄົມຕ່າງໆເປັນຕົ້ນ…
ຊື່ງໃນຕອນທ້າຍສະຫາຍເລຂາຄະນະບໍລິຫານງານຊາວໜຸ່ມ ກວຕ ໄດ້ໂອ້ລົມພ້ອມທັງໃຫ້ທິດຊີ້ນຳ ໃຫ້ທຸກສະຫາຍກຳໄດ້ເຖີງມາດຖານຄຸນສົມບັດເງື່ອນໄຂຂອງຜູ້ລົງສະໝັກ ເພື່ອການຄັດເລືອກເອົາຄະນະບໍລິຫານງານຊຸດໃໝ່ໃຫ້ໄດ້ຜູ້ທີ່ມີເງື່ອນໄຂຄົບຖ້ວນສົມບູນ ໃນກອງປະຊຸມໃຫຍ່ຄັ້ງທີ II ຂອງອົງຄະນະພັກ ກວຕ ທີ່ຈະມີຂື້ນໃນໄວໆນີ້ ທັງເນັ້ນໜັກໃຫ້ບັນດາສະຫາຍສະມາຊິກມີຄວາມໜັກແໜ້ນໃນການຕິດຕາມຂ່າວສານໃຫ້ທັນກັບສະພາບການຜັນແປຂອງໂລກ ໃນປັດຈຸບັນ ເພື່ອບໍ່ໃຫ້ຕົກເປັນເຄື່ອງມືຂອງຜູ້ບໍ່ຫວັງດີໃນການເຄື່ອນໄຫວດ້ານການເມືອງ ຊື່ງສະຫາຍຍັງໄດ້ສະແດງຄວາມຍ້ອງຊົມເຊີຍຕໍ່ໜ່ວຍຊາວໜຸ່ມຮາກຖານ ກມວ ທີ່ມີຄວາມສາມັກຄີເປັນປຶກແຜ່ນໃນການຮ່ວມເຄື່ອນໄຫວໃນຂະບວນການຕ່າງໆ..
ຮູບພາບ ແລະ ບົດຂ່າວ: ທ ພຸດທະຈັນ ຊັບທະວີ
