ກອງປະຊຸມຝຶກອົບຮົມໃນຄັ້ງນີ້ໄດ້ມີພິທີເປີດຂື້ນໃນຕອນເຊົ້າຂອງວັນທີ 05 ກໍລະກົດ 2021 ທີ່ຜ່ານມາ ແລະ ມີການດຳເນີນການຝຶກອົບຮົມມາເປັນເວລາ 4 ມື້ ຈົນເຖີງວັນທີ 08 ກໍລະກົດ 2021 ຈື່ງສຳເລັດ ເຊີ່ງເປັນການຈັດຝຶກອົບຮົມແບບທາງໄກ ພາຍໃຕ້ໂຄງການຊ່ວຍເຫຼືອ ARISE PLUS ຈັດຂື້ນທີ່ໂຮງແຮມເມືອງແທັງ, ນະຄອນຫຼວງວຽງຈັນ ໃຫ້ກຽດເປີດພິທີກອງປະຊຸມຝຶກອົບຮົມໂດຍ ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ກະຊວງອຸດສະຫະກຳ ແລະ ການຄ້າ, ພ້ອມດຽວກັນນັ້ນກໍຍັງໄດ້ຮັບກຽດເຂົ້າຮ່ວມໂດຍທ່ານ ຝຣັ່ງຊົວ ປຣະວົງວຽງຄຳ, ຜູ້ຮັບຜິດຊອບວຽກງານການເມືອງ, ສຳນັກງານຜູ້ຕາງໜ້າ ສະຫະພາບເອີຮົບ ປະຈຳ ສປປ ລາວ ແລະ ທ່ານ ນາງ ໂສດາວັນ ສຸວັນນະພູມ ຜູ້ປະສານງານໂຄງການຊ່ວຍເຫຼືອວຽກງານການຄ້າຂອງສະຫະພາບເອີຮົບ ແກ່ ສປປ ລາວ ພາຍໃຕ້ແຜນງານເຊື່ອມໂຍງອາຊຽນ ARISE PLUS ຝ່າຍລັດຖະບານ, ເຊີ່ງມີນັກສຳມະນາກອນຈາກກົມມາດຕະຖານ ແລະ ວັດແທກ ເຂົ້າຮ່ວມທັງໝົດ 20 ທ່ານ.
ກອງປະຊຸມຝຶກອົບຮົມໃນຄັ້ງນີ້ເປົ້າໝາຍກໍ່ເພື່ອສ້າງຄວາມເຂັ້ມແຂງດ້ານບຸກຄະລາກອນໃຫ້ມີຄວາມພ້ອມ ແລະ ຍົກລະດັບຄວາມຮູ້, ຄວາມເຂົ້າໃຈກ່ຽວກັບມາດຕະຖານສາກົນ ISO 9001:2015 ວ່າດ້ວຍລະບົບການບໍລິຫານຄຸ້ມຄອງຄຸນນະພາບ ໃຫ້ມີປະສິດທິພາບ(QMS) , ພ້ອມດຽວກັນນັ້ນກໍເພື່ອເປັນການສ້າງພະນັກງານພາຍໃນກົມໃຫ້ກາຍເປັນຄູຝຶກທີ່ມີທັກສະ ແລະ ຄວາມສາມາດເພື່ອຖ່າຍທອດຄວາມຮູ້ກ່ຽວກັບລະບົບການບໍລິຫານ ແລະ ຄຸ້ມຄອງຄຸນນະພາບໃຫ້ແກ່ບັນດາພາກລັດ ແລະ ເອກະຊົນ, ທັງເປັນຜົນດີໃຫ້ແກ່ການຄຸ້ມຄອງບໍລິຫານວຽກງານມາດຕະຖານ ແລະ ວັດແທກໃນຕໍ່ໜ້າອີກດ້ວຍ.
ຮູບພາບ ແລະ ບົດຂ່າວ: ທ ພຸດທະຈັນ ຊັບທະວີ
