ໃນວັນທີ 13 ຫາ 16 ສິງຫາ 2020 ສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ໄດ້ສົມທົບກັບຄະນະກຳມະການເຕັກນິກແຫ່ງຊາດ ດ້ານວັດສະດຸກໍ່ສ້າງ ແລະ ພະແນກວິທະຍາສາດ ແລະ ເຕັກໂນໂລຊີ ແຂວງຫຼວງພະບາງ ແລະ ແຂວງໄຊຍະບູລີ ລົງຕິດຕາມກວດກາຄຸນນະພາບ ຜະລິດຕະພັນກະເບື້ອງ ແລະ ຊີມັງ ຂອງບັນດາບໍລິສັດ, ໂຮງງານຜູ້ຜະລິດ ທີ່ຂໍອະນຸຍາດນຳໃຊ້ກາໝາຍມາດຕະຖານແຫ່ງຊາດ ໂດຍໃນການລົງໃນຄັ້ງນີ້ມີ ໂຮງງານ ກະເບື້ອງດີດີເຄ ຈໍາກັດ, ໂຮງງານ ຊີມັງຫຼວງພະບາງ ຈໍາກັດ, ໂຮງງານ ກະເບື້ອງຊີມັງ ກາສິງ ຈໍາກັດ ແລະ ບໍລິສັດ ຊ່ານເລີ້ໂຮງງານຊີມັງລາວ ຂາອອກ – ຂາເຂົ້າ ຈໍາກັດ ເຊິ່ງນໍາພາໂດຍ ທ່ານ ສູນທອນ ຈັນທະເດດ ຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ ເປັນຫົວໜ້າຄະນະ.
ຈຸດປະສົງໃນການລົງຕິດຕາມກວດກາກໍ່ເພື່ອປະຕິບັດຕາມຂັ້ນຕອນ, ລະບຽບການນໍາໃຊ້ກາໝາຍມາດຕະຖານແຫ່ງຊາດ ໃຫ້ຖືກຕ້ອງ ແລະ ສອດຄ່ອງກັບລະບຽບການ ພ້ອມທັງເກັບກໍາສະພາບ ແລະ ປັບປຸງຄຸນນະພາບຜະລິດຕະພັນກະເບື້ອງ ແລະ ຊີມັງ ເພື່ອຮັບປະກັນດ້ານຄຸນນະພາບພ້ອມທັງສ້າງຄວາມເຊື່ອໝັ້ນໃຫ້ແກ່ສັງຄົມ ແລະ ບໍລິສັດເອງ ແນໃສ່ໃຫ້ມີຄວາມເປັນເອກະພາບ, ປອດໄພ, ຍຸດຕິທໍາ ຕໍ່ສັງຄົມ.
ໃນການລົງກວດກາຕິດຕາມໃນຄັ້ງນີ້ທາງຄະນະກຳມະການໄດ້ເກັບເອົາຕົວຢ່າງຜະລິດຕະພັນກະເບື້ອງ ແລະ ຊີມັງ ຂອງບໍລິສັດ ແລະ ໂຮງງານດັ່ງກ່າວ ກັບມາທົດສອບທາງດ້ານຄຸນນະພາບຄືນ ເພື່ຶອອອກອະນຸຍາດ ແລະ ຢັ້ງຢືນຄວາມຖືກຕ້ອງໃນການນໍາໃຊ້ກາໝາຍມາດຕະຖານແຫ່ງຊາດ ໃຫ້ແກ່ບັນດາບໍລິສັດ ແລະ ໂຮງງານດັ່ງກ່າວ.
ຮູບພາບ ແລະ ບົດຂ່າວ: ສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ
