ເພື່ອສືບຕໍ່ພິຈາລະນາຄືນໃນການອອກອະນຸຍາດນຳໃຊ້ກາໝາຍມາດຕະຖານແຫ່ງຊາດ ໃຫ້ແກ່ຜະລິດຕະພັນ ຊີມັງປະສົມ PC 32.5 ແລະ ຊີມັງປອດແລນ PI 52.5 ຂອງບໍລິສັດຊີມັງລາວສະຫວັນນະເຂດຈຳກັດ ຕັ້ງຢູ່ບ້ານ ສະພັງແກ້ວ, ເມືອງ ອາດສະພັງທອງ ແຂວງສະຫວັນນະເຂດ
ສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີຈື່ງໄດ້ສົມທົບກັບພາກສ່ວນທີ່ກ່ຽວຂ້ອງກໍ່ຄື ຄະນະກຳມະການເຕັກນິກແຫ່ງຊາດ ດ້ານວັດສະດຸກໍ່ສ້າງ ແລະ ພະແນກວິທະຍາສາດ ແລະ ເຕັກໂນໂລຊີ ແຂວງສະຫວັນນະເຂດ ເພື່ອຮ່ວມກັນລົງຈັດຕັ້ງປະຕິບັດການຕິດຕາມກວດກາຄືນທາງດ້ານຄຸນນະພາບຂອງຜະລິດຕະພັນດັ່ງກ່າວ ໃນວັນທີ 29 ກັນຍາ 2020 ທີ່ຜ່ານມານີ້, ໂດຍອີງຕາມສັນຍາການນຳໃຊ້ກາໝາຍມາດຕະຖານແຫ່ງຊາດຂອງບໍລິສັດດັ່ງກ່າວ ໃນປີທີ່ຜ່ານມາ. ຊຶ່ງນໍາພາໂດຍ ທ່ານ ນາງ ເພັດມະນີ ຄໍາມະນີໄຊ ຮອງຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ.
ຈຸດປະສົງກໍ່ເພື່ອຕິດຕາມຊຸກຍູ້ສົ່ງເສີມຢ່າງຕໍ່ເນື່ອງເພື່ອໃຫ້ຜະລິດຕະພັນດັ່ງກ່າວໄດ້ຮັບການກວດກາດ້ານຄຸນນະພາບ ແລະ ຢັ້ງຢືນດ້ານມາດຕະຖານແຫ່ງຊາດ ຈາກທາງພາກລັດທີ່ຖືກຕ້ອງຕາມລະບຽບການ ທັງນີ້ກໍ່ເພື່ອແນໃສ່ໃຫ້ສັງຄົມ ກໍ່ຄືຜູ້ຜະລິດ ແລະ ຜູ້ຊົມໃຊ້ໄດ້ຮັບຄວາມເຊື່ອໝັ້ນ ແລະ ໄດ້ຮັບຜົນປະໂຫຍດອັນສູງສຸດບົນພື້ນຖານຄວາມຍຸດຕິທຳປອດໄພ.
ໃນການລົງເຮັດວຽກຮ່ວມກັບບໍລິສັດດັ່ງກ່າວ ທາງຄະນະກຳມະການໄດ້ກວດກາທາງດ້ານເອກະສານ, ໂດຍສະເພາະແມ່ນການຕິດຕາມກວດກາເບິ່ງຂະບວນການຜະລິດຕົວຈິງ ແລະ ສຸມເກັບເອົາຕົວຢ່າງຂອງຜະລິດຕະພັນແຕ່ລະຂະໜາດມາກວດສອບຢູ່ຫ້ອງທົດລອງສົມທຽບໃສ່ກັບມາດຕະຖານແຫ່ງຊາດ ເພື່ອເປັນບ່ອນອີງໃນການຢັ້ງຢືນການນຳໃຊ້ກາໝາຍມາດຕະຖານແຫ່ງຊາດໃຫ້ແກ່ຜະລິດຕະພັນດັ່ງກ່າວຕໍ່ໄປ.
ຮູບພາບ ແລະ ບົດຂ່າວ: ສູນຂໍ້ມູນຂ່າວສານວຽກງານມາດຕະຖານ ແລະ ວັດແທກ
