ໃນຕອນເຊົ້າຂອງວັນທີ 30 ກັນຍາ 2020 ສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ ຂອງກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ຍັງໄດ້ສືບຕໍ່ລົງຕິດຕາມກວດກາຄຸນນະພາບ ຜະລິດຕະພັນນ້ຳສີຂອງໂຮງງານ ຢູອາເພນທສ໌ (ລາວ) ຈຳກັດ ທີ່ຕັ້ງຢູ່ບ້ານ ສີວິໄລ, ເມືອງ ຊະນະສົມບູນ ແຂວງຈຳປາສັກ ໂດຍການສົມທົບກັບຄະນະກຳມະການເຕັກນິກແຫ່ງຊາດ ດ້ານວັດສະດຸກໍ່ສ້າງ ແລະ ພະແນກວິທະຍາສາດ ແລະ ເຕັກໂນໂລຊີແຂວງຈຳປາສັກ. ຊຶ່ງນໍາພາຄະນະລົງເຮັດວຽກໂດຍ ທ່ານ ນາງ ເພັດມະນີ ຄຳມະນີໄຊ ຮອງຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ. ທັງນີ້ກໍ່ເພື່ອປະຕິບັດຕາມລະບຽບການໃນການສືບຕໍ່ຂໍນຳໃຊ້ກາໝາຍມາດຕະຖານແຫ່ງຊາດລາວ ພາຍຫຼັງທີ່ໄດ້ຮັບການອອກໃບຢັ້ງຢືນອະນຸຍາດນຳໃຊ້ກາໝາຍມາດຕະຖານແຫ່ງຊາດຂອງຜະລິດຕະພັນດັ່ງກ່າວໃນປີຜ່ານມາ, ດັ່ງນັ້ນທາງຄະນະກຳມະການຈື່ງໄດ້ລົງຕິດຕາມກວດກາຕົວຈິງຢູ່ໂຮງງານດັ່ງກ່າວຄືນ, ໂດຍສະເພາະແມ່ນການກວດກາທາງດ້ານເອກະສານ, ຕິດຕາມເບິ່ງຂັ້ນຕອນຂະບວນການຜະລິດ ແລະ ສຸມເກັບເອົາຕົວຢ່າງມາກວດສອບຢູ່ຫ້ອງທົດລອງສົມທຽບໃສ່ກັບມາດຕະຖານແຫ່ງຊາດ ເພື່ອເປັນບ່ອນອີງໃນການຄົ້ນຄວ້າພິຈາລະນາໃນການອອກອະນຸຍາດນຳໃຊ້ກາໝາຍມາດຕະຖານແຫ່ງຊາດໃຫ້ແກ່ຜະລິດຕະພັນດັ່ງກ່າວຕໍ່ໄປ.
ຮູບພາບ ແລະ ບົດຂ່າວ: ສູນຂໍ້ມູນຂ່າວສານວຽກງານມາດຕະຖານ ແລະ ວັດແທກ
