ພາຍຫຼັງທີ່ໂຮງງານຈຸງຢາອິຊິຊີມັງລາວ ຈຳກັດ ໄດ້ຮັບການອອກອະນຸຍາດຂື້ນທະບຽນກາໝາຍມາດຕະຖານແຫ່ງຊາດລາວ ຫຼື (ມລ) ທີ່ຖືກຕ້ອງຕາມຂັ້ນຕອນ ແລະ ລະບຽບການການປະເມີນຂອງທາງຄະນະກຳມະການຈາກກົມາດຕະຖານ ແລະ ວັດແທກແລ້ວ ແລະ ໄດ້ດຳເນີນການນຳໃຊ້ກາໝາຍ (ມລ) ກັບຜະລິດຕະພັນຊີມັງຂອງໂຮງງານດັ່ງກ່າວເປັນຕົ້ນມາໂດຍໄດ້ຮັບການລົງຕິດຕາມກວດກາ ແລະ ປະເມີນຄືນທຸກໆປີ ເພື່ອເກັບກໍາສະພາບການ ແລະ ຊຸກຍູ້, ປັບປຸງຄຸນນະພາບຜະລິດຕະພັນດັ່ງກ່າວໃຫ້ຮັບປະກັນດ້ານຄຸນນະພາບຕາມມາດຕະຖານໃນລະດັບສາກົນ.
ດັ່ງນັ້ນ ໃນວັນທີ 22 ຕຸລາ 2020 ທີ່ຜ່ານມານີ້ ທາງສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ, ກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ໂດຍສົມທົບກັບ ຄະນະກຳມະການເຕັກນິກແຫ່ງຊາດດ້ານຜະລິດຕະພັນວັດສະດຸກໍ່ສ້າງ ແລະ ພະແນກວິທະຍາສາດ ແຂວງ ສາລະວັນ ເພື່ອລົງຕິດຕາມ ແລະ ປະເມີນຄືນດ້ານຄຸນນະພາບຂອງຊິມັງທີ່ໄດ້ຮັບການຢັ້ງຢືນກາໝາຍ (ມລ) ຢູ່ທີ່ໂຮງງານດັ່ງກ່າວ ເຊີ່ງຕັ້ງຢູ່ ບ້ານຕົງຊວຍ, ເມືອງ ສາລະວັນ, ແຂວງ ສາລະວັນ. ທັງນີ້ກໍ່ເພື່ອສືບຕໍ່ໃນການລົງຕິດຕາມປະຈຳປີ 2020 ໂດຍປະຕິບັດຕາມຂັ້ນຕອນ ໃຫ້ຖືກຕ້ອງ ແລະ ສອດຄ່ອງກັບລະບຽບການ.
ໃນການລົງເຮັດວຽກຕົວຈິງເບື້ອງຕົ້ນທາງຄະນະກຳມະການກໍ່ໄດ້ກວດກາທາງດ້ານເອກະສານທີ່ກ່ຽວຂ້ອງ ແລະ ໄດ້ລົງຕິດຕາມກວດກາເບີ່ງຂະບວນການຜະລິດຕົວຈີງທຸກຂັ້ນຕອນພ້ອມທັງປະເມີນຕາມຕົວຈິງ ຫຼັ້ງຈາກນັ້ນ ກໍ່ໄດ້ທຳການສຸ່ມເກັບເອົາຕົວຢ່າງຜະລິດຕະພັນຊີມັງ ມາກວດສອບຢູ່ຫ້ອງທົດລອງເພື່ອປະເມີນຜົນດ້ານຄຸນນະພາບໂດຍທຽບໃສ່ກັບມາດຕະຖານແຫ່ງຊາດ, ເພື່ອເປັນບ່ອນອິງໃນການຄົ້ນຄວ້າ ແລະ ພິຈາລະນາຢັ້ງຢືນການນໍາໃຊ້ກາໝາຍມາດຕະຖານແຫ່ງຊາດ ໃຫ້ແກ່ຜະລິດຕະພັນດັ່ງກ່າວຕໍ່ໄປ.
ຮູບພາບ: ນາງ ສຸກມະນີ
ບົດຂ່າວ: ທ ພຸດທະຈັນ ຊັບທະວີ
