ໃນຕອນແລງຂອງວັນທີ 20 ຕຸລາ 2020 ທາງຄະນະນຳກະຊວງ ວິທະຍາສາດ ແລະ ເຕັກເໂນໂລຊີ ເຊີ່ງນຳໂດຍ ທ່ານ ບັນດິດ ສຈ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ມີທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ທ່ານ ພຸດທະສັກ ວິຈິດຕຣາ ຫົວໜ້າຫ້ອງການກະຊວງ, ທ່ານ ປອ ຄຳເພັດ ວົງດາລາ ຫົວໜ້າ ກົມແຜນການ ແລະ ການຮ່ວມມື ແລະ ພະນັກງານກົມມາດຕະຖານ ແລະ ວັດແທກ ທີ່ຖືກແຕ່ງຕັ້ງເຂົ້າຮ່ວມ ເຊີ່ງໃຫ້ກຽດຕ້ອນຮັບໂດຍ ທ່ານ He jun ຮອງຜູ້ອຳນວຍການ ບໍລິສັດດັ່ງກ່າວ ພ້ອມດ້ວຍຄະນະ.
ຈຸດປະສົງເພື່ອຢ້ຽມຢາມ ແລະ ປຶກສາຫາລືກ່ຽວກັບທິດທາງແຜນການໃນການຮ່ວມມືລະຫວ່າງພາກລັດ ແລະ ເອກະຊົນໃນໂຂງເຂດວຽກງານທີກ່ຽວຂ້ອງ ໂດຍສະເພາະວຽກງານກວດກາຄຸນນະພາບນໍ້າມັນ ຢູ່ ສປປ ລາວ ທີ່ຕິດພັນກັບ ກົມມາດຕະຖານ ແລະ ວັດແທກ.
ໂອກາດດັ່ງກ່າວ ທ່ານ He jun ກໍ່ໄດ້ນຳສະເໜີກ່ຽວກັບຄວາມເປັນມາ ແລະ ການດຳເນີນວຽກງານຂອງບໍລິສັດ ໂດຍທ່ານໄດ້ກ່າວວ່າ: ສູນກວດສອບນໍ້າມັນເຊື້ອໄຟ ຂອງບໍລິສັດເປໂຕຼເຄມີ ລາວ ຈຳກັດ ແມ່ນໄດ້ຮັບການສ້າງຕັ້ງໃນປີ 2014 ແລະ ສຳເລັດໃນປີ 2017 ໂດຍການຮ່ວມມືລະຫວ່າງລາວ-ຈິນ ເຊີ່ງໂຄງການສ້າງສູນດັ່ງກ່າວນີ້ແມ່ນມີແຜນການພັດທະນາເປັນ 3 ໄລຍະ ເຊີ່ງໃນຊວງການພັດທະນາໃນໄລຍະ 5 ຫາ 10 ປີ ທາງບໍລິສັດແມ່ນຈະໄດ້ສຸມໃສ່ຜະລິດໃຫ້ສາມາດບັນລຸ 3 ລ້ານໂຕນຕໍ່ປີຕາມແຜນ ໂດຍໃນໄລຍະທີ 1 ແມ່ນຈະໃຫ້ສາມາດຜະລິດນໍ້າມັນຕາມມາດຕະຖານ ຢູໂລ4 ແລະ ຢູໂລ5 ພ້ອມກັນນັ້ນທາງບໍລິສັດກໍ່ຍັງມີແຜນບຸກບືນຄົ້ນຄ້ວາພັດທະນາການຜະລິດນໍ້າມັນໄບໂອ, ນໍ້າມັນຈາກມັນຕົ້ນ ແລະ ຈາກຕົ້ນປາມ ແລະ ຈະໄດ້ມີການຮ່ວມມືກັບທາງພາກລັດໂດຍສະເພາະແມ່ນກະຊວງທີ່ກ່ຽວຂ້ອງເພື່ອໃຫ້ສາມາດທຳການຜະລິດພະລັງງານທີ່ສະອາດເພື່ອຮັບໃຊ້ໃນ ສປປ ລາວ. ຄາດວ່າພາຍໃນເດືອນ 11 ປີ 2020 ໂຄງການດັ່ງກ່າວຈະໄດ້ຮັບການກໍ່ສ້າງສຳເລັດທັງໝົດ, ໃນປັດຈຸບັນທາງບໍລິສັດແມ່ນຢູ່ໃນຂັ້ນຕອນຂອດຂອງການສອບທຽບເຄື່ອງຈັກ, ລ້າງທໍ່ ແລະ ຖັງ ເພື່ອກຽມພ້ອມໃນການທົດລອງ ໂດຍຕາມແຜນໃນທ້າຍເດືອນ 11 ນີ້ ຈະໃຫ້ສາມາດທົດລອງຜະລິດຕົວຈິງ ແລະ ກຽມເປີດນຳໃຊ້ສູນດັ່ງກ່າວຢ່າງເປັນທາງການເຊີ່ງຈະກົງກັບວັນຊາດຂອງ ສປປ ລາວ.
ໃນໄລຍະທີ1 ແມ່ນຈະໃຫ້ສາມາດຜະລິດໄດ້ 3 ແສນໂຕນຕໍ່ປີ ເຊີ່ງໃນນັ້ນຈະປະກອບມີ ນໍ້າມັນແອດຊັງ, ກາຊວນ ທາງບໍລິສັດຍັງມີເຄື່ອງຜະລິດນໍ້າມັນກາຊວນໂດຍການເພີ້ມທາດໄຮໂດເຈນສາມາດຜະລິດໄດ້ປະມານ 500,000ໂຕນ, ເຄື່ອງເກັບກູ້ທາດມາດເພື່ອໄປຜະລິດເປັນຜະລິດຕະພັນທາດມາດທີ່ສາມາດຜະລິດໄດ້ປະມານ 5000 ໂຕນຕໍ່ປີ, ເຄື່ອງເພີ້ມຄວາມດັນໃນການກັ່ນນໍ້າມັນສາມາດຜະລິດໄດ້ປະມານ 600,000 ໂຕນ ແລະ ຍັງມີການຕິດຕັ້ງລະບົບທີ່ກ່ຽວຂ້ອງໃນການຜະລິດຕ່າງໆ. ໃນໄລຍະທຳອິດນີ້ ການຕິດຕັ້ງລະບົບຕ່າງໆກໍ່ຖືວ່າຄົບຊຸດຕາມຫຼັກການທີ່ກຳນົດ ເຊີ່ງຄາດໝາຍຜະລິດຕະພັນທີ່ຈະໄດ້ຮັບກໍ່ຄື ນໍ້າມັນກາຊວນ 500,000 ໂຕນຕໍ່ປີ, ນໍ້າມັນແອດຊັງ90 ຈະໄດ້ປະມານ 250,000 ໂຕນຕໍ່ປີ ແລະ ນໍ້າມັນແອດຊັງ95 ຈະໄດ້ປະມານ 7 ມື່ນປາຍໂຕນ, ອາຍແກ໊ສ LPG ຈະໄດ້ປະມານ 3ພັນປາຍໂຕນ, ທາດມາດໄດ້ປະມານ 3000 ໂຕນ ໂດຍສະເລ່ຍແລ້ວແມ່ນຖືວ່າສາມາດຕອບສະໜອງຕາມຄວາມຕ້ອງການຂອງ ສປປ ລາວ ໄດ້ 60%
ທ່ານ ຍັງໄດ້ສະເໜີຕື່ມກ່ຽວກັບຫ້ອງທົດລອງຂອງບໍລິສັດ ວ່າ: ຫ້ອງທົດລອງຂອງທາງບໍລິສັດແມ່ນໄດ້ສ້າງໃນເນື້ອທີ່ 1,647 ຕາແມັດ ເຊີ່ງມີການອອກແບບກໍ່ສ້າງທີ່ທັນສະໄໝຕາມມາດຕະຖານສາກົນ ແລະ ມາດຕະຖານໃນການວິເຄາະນໍ້າມັນແມ່ນໄດ້ສອດຄ່ອງກັບມາດຕະຖານສາກົນ ສາມາດວິໃຈໄດ້ຕາມມາດຕະຖານສາກົນວາງອອກ ໃນນັ້ນສາມາດກວດສອບວິໃຈ ໂຄຼມາໂຕກຣາຟີ, ການວິໃຈການດູດຊັບອາຕອມ, ການວິໃຈທາດມູນເຄມີ, ການວິໃຈຄຸນນະພາບນໍ້າ, ການວິໃຈສີ່ງແວດລ້ອມ ແລະ ການກວດສອບຄ່າອົກຕານ ແລະ ເຊຕານ ເຊີ່ງປັດຈຸບັນທາງບໍລິສັດແມ່ນສາມາດກວດສອບວິໃຈ ນໍ້າມັນດິບ, ແອດຊັງ, ກາຊວນ, ນໍ້າມັນຍົນ, benzene, ອາຍແກ໊ສ LPG , ນໍ້ມັນເຄື່ອງ, ຜະລິດຕະພັນທາດມາດ ແລະ ຍັງມີຜະລິດຕະພັນອື່ນໆທີ່ກ່ຽວຂ້ອງອີກ.ສາມາດດຳເນີນການກວດສອບຢ່າງເຕັມຮູບແບບໃນການກວດສອບນ້ໍາມັນດິບ, ສາມາດຄວບຄຸມຄຸນນະພາບການຜະລິດ, ກວດສອບຜະລິດຕະພັນນໍ້າມັນສຳເລັດຮູບ, ສະພາບແວດລ້ອມຂອງໂຮງກັ່ນນໍ້າມັນ ແລະ ລະບົບນໍ້າເສຍຕ່າງໆຄົບວົງຈອນ.
ໃນປັດຈຸບັນສູນກວດສອບນໍ້າມັນເຊື້ອໄຟດັ່ງກ່າວແມ່ນກຳລັງສະເໜີໃຫ້ຄະນະກຳມະການປະເມີນຜົນ ແລະ ຢັ້ງຢືນຮັບຮອງ ຈາກອົງການ ຊີນັດ(CNAS) ຂອງ ສປ ຈີນ ເພື່ອເດີນໜ້າໄປສູ່ເປົ້າໝາຍທີ່ທັນສະໄໝຄືກັບຕ່າງປະເທດ ແລະ ສາກົນ, ເພື່ອບັນລຸ ການກວດສອບພຽງຄັ້ງດຽວ, ສາມາດຍອມຮັບຈາກທົ່ວໂລກ ແລະ ເພື່ອຕອບສະໜອງການບໍລິການທີ່ມີຄຸນນະພາບໃນການກໍ່ສ້າງເສດຖະກິດຂອງ ສປປ ລາວ.
ຮູບພາບ ແລະ ບົດຂ່າວ: ທ ພຸດທະຈັນ ຊັບທະວີ
