ໃນວັນທີ 13 ພຶດສະພາ 2022 ກົມມາດຕະຖານ ແລະ ວັດແທກ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມປຶກສາຫາລື ແລະ ປະກອບຄຳເຫັນແບບເຊິ່ງໜ້າ ຜ່ານຮ່າງດໍາລັດ ວ່າດ້ວຍ ການປັບໃໝ ແລະ ນຳໃຊ້ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບວຽກງານມາດຕະຖານ ແລະ ການວັດແທກ ຂື້ນເປັນຄັ້ງທີ 3, ຢູ່ທີ່ຫ້ອງປະຊຸມ ໂຮງແຮມທະວີສຸກ ເມືອງວັງວຽງ ແຂວງວຽງຈັນ. ໃຫ້ກຽດເປັນປະທານດຳເນີນກອງປະຊຸມໂດຍ ທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ, ຄະນະພັກກະຊວງ ແລະ ທັງເປັນຮອງຫົວໜ້າຄະນະຮັບຜິດຊອບສ້າງ 2 ຮ່າງດຳລັດດັ່ງກ່າວ. ເຊິ່ງມີຜູ້ເຂົ້າຮ່ວມຈາກບັນດາຫ້ອງການ, ກົມ, ສະຖາບັນ ແລະ ຜູ້ຕາງໜ້າຈາກຂະ ແໜງການທີ່ກຽ່ວຂ້ອງເຂົ້າຮ່ວມທັງໝົດ ຈໍານວນ 45 ທ່ານ ໃນຂອບເຂດທົ່ວປະເທດ.
ເປົ້າໝາຍການຈັດກອງປະຊຸມການສ້າງ 2 ດໍາລັດຄັ້ງນີ້ ເພື່ອເປັນບ່ອນອີງ ສຳລັບການ ຈັດຕັ້ງປະຕີບັດການຄຸ້ມຄອງວຽກງານ ໃນການຜັນຂະຫຍາຍມາເປັນນິຕິກຳລຸ່ມກົດໝາຍ ແລະ ລະບຽບການທີ່ກໍານົດສະເພາະ ກ່ຽວກັບການປັບໃໝ ແລະ ນໍາໃຊ້ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບວຽກງານມາດຕະຖານ ແລະ ການວັດແທກ. ຕໍ່ກັບເງື່ອນໄຂສະພາບປະຈຸບັນຈຶ່ງມີຄວາມຈໍາເປັນຕ້ອງໄດ້ສ້າງ 2 ດຳລັດນີ້ຂຶ້ນມາເພື່ອເປັນບ່ອນອີງ ໃຫ້ແກ່ການຈັດຕັ້ງປະຕີບັດການຄຸ້ມຄອງກຽ່ວກັບວຽກງານມາດຕະຖານ ແລະ ການວັດແທກ, ໃຫ້ໄດ້ປະສິດທິພາບ ແລະ ຖືກຕ້ອງຕາມລະບຽບຫຼັກການທີ່ກໍານົດໄວ້, ເຊິ່ງຜ່ານມາແມ່ນມີຫຼາຍບັນຫາເກີດຂຶ້ນໃນທົ່ວສັງຄົມ, ເຊິ່ງເຮັດໃຫ້ໄດ້ຮັບຜົນກະທົບຈາກການລະເມີດ ຂອງບຸກຄົນ, ນິຕິບຸກຄົນ ແລະ ການຈັດຕັ້ງ ອັນໄດ້ສ້າງຜົນເສຍຫາຍຕໍ່ສັງຄົມ ແລະ ສິ່ງແວດລ້ອມເຊັ່ນ: ຜະລິດຕະພັນ ແລະ ສິນຄ້າ ບໍ່ໄດ້ມາດຕະຖານ, ມີຄຸນນະພາບຕໍ່າ, ເຄຶ່ອງມືອຸປະກອນການວັດແທກທີ່ບໍ່ມີຄວາມຖຶກຕ້ອງ, ຊັດເຈນ ແລະ ມີພຶດຕິກໍາການລະເມີດຫລາຍຮູບແບບທີ່ຜິດຕໍ່ລະບຽບຂອງວຽກງານດັ່ງກ່າວ.
ສະນັ້ນ, ການຈັດຕັ້ງ ປະຕິບັດ ຂອງຜູ້ປະກອບການທີ່ຜະລິດ, ນໍາເຂົ້າ, ສົ່ງອອກ ແລະ ຈໍາໜ່າຍຜະລິດຕະພັນ ແລະ ສິນຄ້າ, ເຄຶ່ອງມືອຸປະກອນການວັດແທກ ຢູ່ ສປປ ລາວ ໃຫ້ມີປະສິດທິພາບ ແລະ ປະສິດທິຜົນສູງຂື້ນ ທັງຍົກສູງຄວາມຮັບຜິດຊອບຂອງຕົນຕໍ່ກັບສັງຄົມ ແລະ ຜູ້ຊົມໃຊ້ ຕ່າງຝ່າຍຕ່າງ ມີຜົນປະໂຫຍດຮ່ວມກັນ, ກົມມາດຕະຖານ ແລະ ວັດແທກ, ກະຊວງອຸດສາຫະກໍາ ແລະ ການຄ້າ ຈຶ່ງໄດ້ສ້າງ 2 ຮ່າງດໍາລັດສະບັບນີ້ຂື້ນມາ ເພື່ອຮັບປະກັນຄວາມປອດໄພ, ຄວາມຍຸຕິທຳ ແລະ ສິດຜົນປະໂຫຍດອັນຊອບທໍາຂອງຜູ້ປະກອບການ ແລະ ຜູ້ຊົມໃຊ້, ເພື່ອຄຸ້ມຄອງຄຸນນະພາບຂອງຜະລິດຕະພັນ ແລະ ສິນຄ້າ ໃຫ້ສອດຄ່ອງລະບຽບກົດໝາຍ ແລະ ລະບຽບການທີ່ກ່ຽວຂ້ອງ. ກອງປະຊຸມໄດ້ຄົ້ນຄວ້າ, ປຶກສາຫາລື ແລະ ເປັນເອກະພາບກັນ ເພື່ອສ້າງຮ່າງດໍາລັດດັ່ງກ່າວໃນຄັ້ງນີ້ ດ້ວຍຄວາມຮັບຜິດຊອບຢ່າງສູງ ແລະ ໄດ້ພ້ອມກັນສຸມໃສ່ປະກອບຄຳຄິດເຫັນເພື່ອເຮັດໃຫ້ຮ່າງດໍາລັດ 2 ສະບັບນີ້ ສົມບູນ ແລະ ກອງປະຊຸມແມ່ນໄດ້ຮັບຜົນສຳເລັດຕາມຄາດໝາຍທີ່ວາງໄວ້.
