ໃນວັນທີ 30 ມິຖຸນາ 2022 ກົມ ມາດຕະຖານ ແລະ ວັດ ແທກ, ກະຊວງອຸດສາຫະກຳ ແລະ ການຄ້າ ໄດ້ມີການຈັດ ກອງປະຊຸມປຶກສາຫາລືກ່ຽວກັບການດັດແກ້ມາດຕະຖານແຫ່ງຊາດ ໃນຂົງເຂດຜະລິດຕະພັນດ້ານນ້ຳມັນເຊື້ອໄຟ ແລະ ອາຍແກັສ ຂື້ນທີ່ ຫ້ອງປະຊຸມກົມ ມາດຕະຖານ ແລະ ວັດ ແທກ. ໂດຍໃຫ້ກຽດເປັນທ່ານຮ່ວມ ໂດຍ ທ່ານ ນາງ ນິສິດ ຄຳມູນເຮືອງ ຮອງຫົວໜ້າກົມມາດຕະຖານ ແລະ ວັດແທກ ແລະ ທ່ານທອງດຳ ຂຸນອຸດົມ ຫົວໜ້າໜ່ວຍງານ ໃນຂົງເຂດຜະລິດຕະພັນນໍ້າມັນເຊື້ອໄຟ ແລະ ອາຍແກັສ , ພ້ອມດຽວກັນນັ້ນກໍ່ຍັງມີບັນດາແຂກຖືກເຊີນຈາກບໍລິສັດນໍ້າມັນເຊື້ອໄຟ ເຂົ້າຮ່ວມ ຈຳນວນ16ບໍລິສັດ ພ້ອມດ້ວຍພະນັກງານ ວິຊາການ ຈາກ ກົມມາດຕະຖານ ແລະ ວັດ ແທກເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ແມ່ນ ອີງຕາມຄວາມຕ້ອງການຂອງສັງຄົມ ແລະ ສະພາບການນຳໃຊ້ນຳ້ມັນໃນປັດຈຸບັນ ເພື່ອອຳນວຍຄວາມສະດວກໃຫ້ສັງຄົມໃນການນຳໃຊ້ນຳ້ມັນເຊື້ອໄຟ ໃຫ້ມີຫຼາຍທາງເລືອກ ຈຶ່ງຈັດກອງປະຊຸມນີ້ຂຶ້ນມາ ເພື່ອທາບທາມ ແລະ ປຶກສາຫາລື ເພື່ອເປັນບ່ອນອີງໃນການດັດແກ້ ຫຼື ສ້າງ ມາດຕະຖານແຫ່ງຊາດກ່ຽວກັບນຳ້ມັນເຊື້ອໄຟ ແລະ ການນຳເຂົ້າຍານພາຫະນະ ໃຫ້ສອດຄ່ອງກັບລະບຽບການພາກພື້ນ ແລະ ສາກົນ.
