ໃນວັນທີ 13 ກໍລະກົດ 2022 ສູນກວດສອບຄຸນນະພາບແບບບໍ່ທຳລາຍ, ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ໄດ້ຈັດພິທີ ມອບ–ຮັບ ໃບຢັ້ງຢືນການກວດສອບຄຸນນະພາບອຸປະກອນເຄື່ອງສາຍລັງສີເອັກສະເລແລະ ເຄື່ອງ CT Scanner ທາງດ້ານການແພດໃຫ້ ແກ່ໂຮງໝໍ ຮ່າໂນ້ຍ–ວຽງຈັນ, ສັນຕິພາບ ໂປລີ ຄຼີນິກ ແລະ ສູນການແພດບົ່ງມະຕິພະຍາດສາກົນ (IMDC) ຢູ່ທີ່ຫ້ອງປະຊຸມ ກົມມາດຕະຖານ ແລະ ວັດແທກ, ເຊິ່ງໃຫ້ກຽດເປັນປະທານ ແລະ ມອບໃບຢັ້ງຢືນໂດຍ ທ່ານ ປ.ອ ສົມພອນໄຊ ວົງດາລາ ຮອງຫົວໜ້າ ກົມມາດຕະຖານ ແລະ ວັດແທກ, ພ້ອມນີ້ກໍ່ມີພະນັກງານສູນກວດສອບຄຸນພະພາບແບບບໍ່ທຳລາຍ ແລະ ຜູ້ຕາງໜ້າຈາກບັນດາໂຮງໝໍທັງ 3 ພາກສ່ວນ ເຂົ້າຮ່ວມ, ວຽກງານການກວດສອບຄຸນນະພາບເຄື່ອງເອັກສະເລທາງການແພດ ກໍ່ແມ່ນວຽກງານໜຶ່ງທີ່ກົມມາດຕະຖານ ແລະ ວັດແທກ ມີພາລະບົດບາດໃນການຄຸ້ມຄອງ, ກວດສອບ ແລະ ຢັ້ງຢືນ ໂດຍສະເພາະແມ່ນສູນກວດສອບຄຸນນະພາບແບບບໍ່ທຳລາຍ ເພື່ອແນໃສ່ຮັບປະກັນຄວາມປອດໄພ ການນຳໃຊ້ເຄື່ອງສາຍລັງສີຕໍ່ກັບຄົນເຈັບ ແລະ ແພດໝໍທີ່ນຳໃຊ້ເຄື່ອງໃຫ້ໄດ້ຮັບສານເຄມີແລະ ປະລິມານລັງສີໜ້ອຍທີ່ສຸດ ພ້ອມທັງການຕິດຕັ້ງເຄື່ອງອຸປະກອນເອັກສະເລໃນຫ້ອງກວດໄດ້ຕາມມາດຕະຖານ ເພື່ອຊຸກຍູ້ສົ່ງເສີມການນຳໃຊ້ເຄື່ອງເອັກສະເລໃຫ້ໄດ້ຄຸນນະພາບ ແລະ ມີປະສິດທິພາບສູງ ແນໃສ່ສ້າງຄວາມເຂັ້ມແຂງໃຫ້ທຸລະກິດການບໍລິການຮັກສາສຸຂະພາບພາຍໃນໃຫ້ເຕີບໃຫຍ່ເຂັ້ມແຂງ, ສາມາດແຂ່ງຂັນໃນຕະຫຼາດພາຍໃນ ແລະ ສາກົນ ປະກອບສ່ວນເຂົ້າໃນການພັດທະນາ ເສດຖະກິດ–ສັງຄົມ ຂອງຊາດ.
