ໃນວັນທີ 7-9 ສິງຫາ 2019, ສູນວັດແທກ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ໄດ້ລົງເຄື່ອນໄຫວກວດສອບປະລິມານທີ່ບັນຈຸໃນສິນຄ້າຫຸ້ມຫໍ່ (ປະເພດ ນ້ຳຢາລ້າງຈານກາຊ້າງຄຳ, ນ້ຳຢາເຊັດແວ່ນ, ຢຸ່ທີ່ບໍລິສັດ ວຽງຈັນຈິນຊຽງ ຜະລິດວັດສະດຸການລ້າງ ຈຳກັດຜູ້ດຽວ ຕັ້ງຢູ່ ບ້ານດົງນາທອງເມືອງ ສີໂຄດຕະບອງ ແຂວງ ນະຄອນຫຼວງວຽງຈັນ ແລະ ໝາກຕາວເຊື່ອມບ້ານເກີນ, ສາລີກະປ໋ອງບ້ານເກີນ, ນ້ຳໝາກນັດບ້ານເກີນ ແລະ ຜັກທຽມດອງບ້ານເກີນ ຢູ່ທີ່ສາຂາ ບໍລິສັດ ອຸດສາຫະກຳ ກະສິກຳ ຈຳກັດ ບ້ານໂພນປ່າເປົ້າ ເມືອງ ສີສັດຕະນາກ ແຂວງ ນະຄອນຫຼວງວຽງຈັນ, ຊຶ່ງນຳພາການລົງຕິດຕາມກວດສອບໂດຍ ທ່ານ ນາງ ຈັນສຸດາ ແກ້ວວົງກົດ, ວິຊາການ ສູນວັດແທກ ພ້ອມດ້ວຍພະນັກງານວິຊາການພາຍໃນສູນອີກ 02 ທ່ານ.
ການລົງກວດສອບໃນຄັ້ງນີ້ ແມ່ນໄດ້ກວດສອບດ້ວຍການຊັ່ງປະລິມານຄື: ນ້ຳຢາເຊັດແວ່ນ ຂະໜາດ 5000 ml, ນ້ຳຢາລ້າງຈານ ຂະໜາດ 800 ml , ແລະ 2000 ml , ນໍ້າໝາກນັດ ບ້ານເກີນ ຂະໜາດ 330 ml, ສາລີກະປ໋ອງ ບ້ານເກີນ ຂະໜາດ 400 ກຼາມ, ໝາກຕາວເຊື່ອມ ບ້ານເກີນ ຂະໜາດ 855 ກຼາມ ແລະ ຜັກທຽມດອງ ຂະໜາດ 1,750 ກຼາມ ຜ່ານການກວດສອບໃນຄັ້ງນີ້ເຫັນວ່າບໍລິມາດທີ່ບັນຈຸແມ່ນໄດ້ຕາມມາດຕະຖານທີ່ກຳນົດໄວ້.
ທ່ານ ນາງ ຈັນສຸດາ ແກ້ວວົງກົດ ໄດ້ໃຫ້ຮູ້ວ່າ: ການລົງກວດສອບຄັ້ງນີ້ ແມ່ນເພື່ອປະຕິບັດຕາມລະບຽບການ, ຫຼັກການກວດສອບສິນູ້າຫຸ້ມຫໍ່, ແລະ ມາດຕະການກ່ຽວກັບການຄຸ້ມຄອງ, ກວດສອບຜະລິດຕະພັນ ແລະ ສິນຄ້າຫຸ້ມຫໍ່ທີ່ຜະລິດ, ນຳເຂົ້າ, ສົ່ງອອກ ແລະ ຈຳໜ່າຍຢູ່ ສປປລາວ ໃຫ້ຖືກຕ້ອງຕາມລະບຽບການທີ່ກຳນົດໄວ້ຢູ່ ສປປ ລາວ ແລະ ສາກົນ ເພື່ອສ້າງເງື່ອນໄຂອັນສະດວກໃນການຊື້ຂາຍ, ແນໃສ່ເຮັດໃຫ້ສັງຄົມມີຄວາມຍຸດຕິທຳ, ປອດໄພ ແລະ ມີຄວາມເປັນເອກະພາບໃນການຈັດຕັ້ງປະຕິບັດ ໃນຂອບເຂດທົ່ວປະເທດ ແລະ ເຊື່ອມໂຍງກັບຫຼັກການກວດສອບຂອງພາກພື້ນ ແລະ ສາກົນ, ເພື່ອບໍ່ໃຫ້ເອົາປຽບກັນລະຫວ່າງຜູ້ຊື້ ແລະ ຜູ້ຂາຍ ແລະ ລະຫວ່າງໂຮງງານກັບໂຮງງານ ແນໃສ່ໃຫ້ການຊື້ຂາຍໃນສັງຄົມ ໃຫ້ມີຄວາມຍຸດຕິທຳບໍ່ໃຫ້ເອົາລັດເອົາປຽບກັນ.