ເມື່ອວັນທີ 02-04 ຕຸລາ 2019 ທີ່ຜ່ານມາ ສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ ໄດ້ສົມທົບກັບຄະນະກຳມະການເຕັກນິກແຫ່ງຊາດດ້ານວັດສະດຸກໍ່ສ້າງ ແລະ ພະແນກວິທະຍາສາດ ແລະ ເຕັກໂນໂລຊີ ແຂວງຄຳມ່ວນ ໄດ້ລົງຕິດຕາມກວດກາຄຸນນະພາບຜະລິດຕະພັນປະເພດຊີມັງ ທີ່ຜະລິດໂດຍບໍລິສັດ ຄຳມ່ວນ ຊີມັງ ຈຳກັດ, ຕັ້ງຢູ່ບ້ານ ໂພວາ, ເມືອງ ມະຫາໄຊ, ແຂວງຄຳມ່ວນ. ນໍາພາໂດຍ ທ່ານ ສູນທອນ ຈັນທະເດດ ຮອງຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ.
ເພື່ອລົງຊຸກຍູ້ການຜະລິດໃຫ້ຖືກຕ້ອງຕາມຂັ້ນຕອນໃນການອອກອະນຸຍາດນໍາໃຊ້ກາໝາຍມາດຕະຖານແຫ່ງຊາດກັບຜະລິດຕະພັນຊີມັງ 02 ປະເພດຂອງບໍລິສັດດັ່ງກ່າວຄື:
- ຊີມັງກາເສືອ
ປະເພດ (Class): ຮັບໃຊ້ການກໍ່ສ້າງ
ຊະນິດ (Type): ຊີມັງປະສົມ
ຂະໜາດ (Size): 40 ກິໂລກຼາມ/ເປົາ
ຊັ້ນ (Grade): –
- ຊີມັງກາຊ້າງແດງ SCG
ປະເພດ (Class): ຮັບໃຊ້ການກໍ່ສ້າງ
ຊະນິດ (Type): ຊີມັງປອດແລນ
ຂະໜາດ (Size): 50 ກິໂລກຼາມ/ເປົາ
ຊັ້ນ (Grade): ປະເພດ 1
ໃນການຈັດຕັ້ງປະຕິບັດເບື້ອງຕົ້ນແມ່ນໄດ້ລົງກວດກາຕົວຈິງຢູ່ໂຮງງານ, ໂດຍສະເພາະແມ່ນການກວດກາທາງດ້ານເອກະສານ, ກວດກາເບີ່ງຂະບວນການຜະລິດຕົວຈີງ ແລະ ສຸ່ມເກັບເອົາຕົວຢ່າງມາກວດສອບຢູ່ຫ້ອງທົດລອງເພື່ອສົມທຽບໃສ່ກັບມາດຕະຖານແຫ່ງຊາດ ເພື່ອເປັນບ່ອນອີງໃນການຄົ້ນຄວ້າ ແລະ ພິຈາລະນາກ່ອນການອອກອະນຸຍາດນໍາໃຊ້ກາໝາຍມາດຕະຖານແຫ່ງຊາດ ໃຫ້ແກ່ຜະລິດຕະພັນຂອງບໍລິສັດດັ່ງກ່າວ.
ຮູບພາບ ແລະ ບົດຂ່າວ: ອໍລະຊຸນ ມະນີ
