ໃນວັນທີ 12-14 ພະຈິກ ປີ 2019 ທີ່ຫ້ອງປະຊຸມໂຮງແຮມ ດອນຈັນພາເລດ, ສູນຮັບຮອງແຫ່ງຊາດ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີໄດ້ຈັດກອງປະຊຸມຝຶກອົບຮົມກ່ຽວກັບການສ້າງຄວາມອາດສາມາດໃຫ້ແກ່ຫ້ອງທົດລອງ, ຫ້ອງກວດສອບ ແລະ ຫ້ອງສອບທຽບເພື່ອໃຫ້ສອດຄ່ອງກັບມາດຕະຖານສາກົນ ISO/IEC17025:2017 (ສະບັບປັບປຸງໃໝ່), ປະທານກ່າວເປີດງານຄັ້ງນີ້ໂດຍ ທ່ານ ວຽງຄຳ ສິງສອນໄຊ ຮອງຫົວໜ້າກົມມາດຕະຖານ ແລະ ວັດແທກ.
ກອງປະຊຸມຝຶກອົບຮົມຄັ້ງນີ້ຈະດຳເນີນເປັນເວລາ 3 ວັນ ເຊິ່ງມີຜູ້ເຂົ້າຮ່ວມທັງໝົດຈຳນວນ 30 ທ່ານ ຈາກບັນດາຜູ້ມີສ່ວນຮ່ວມທັງພາກລັດ ແລະ ເອກະຊົນໂດຍໄດ້ມີຈຸດປະສົງເພື່ອສ້າງຄວາມເຂັ້ມແຂງທາງດ້ານວິຊາການ, ຍົກລະດັບຄວາມຮູ້ຄວາມສາມາດໃຫ້ແກ່ພະນັກງານພາກລັດ ແລະ ພາກເອກະຊົນທີ່ກ່ຽວຂ້ອງກັບຫ້ອງທົດລອງ, ຫ້ອງກວດສອບ, ຫ້ອງສອບທຽບໃຫ້ມີປະສິດທິພາບ ແລະ ປະສິດທິຜົນໂດຍໃຫ້ສອດຄ່ອງກັບມາດຕະຖານສາກົນ ISO/IEC 17025:2017 ເຊິ່ງມີຊ່ຽວຊານຈາກໂຄງການສ້າງຄວາມເຂັ້ມແຂງທາງດ້ານວິຊາການ (PTB) ແຫ່ງປະເທດເຢຍລະມັນ, ສຳລັບການດຳເນີນການປະເມີນຄວາມສອດຄ່ອງເພື່ອແນ່ໃສການໃຫ້ບໍລິການທີ່ມີຄວາມໂປ່ງໃສ, ເປັນກາງ, ຊັດເຈນ ແລະ ໄດ້ມາດຕະຖານ, ມີຂັ້ນຕອນການຈັດຕັ້ງປະຕິບັດ, ມີຄວາມສາມາດໃນວິຊາສະເພາະທີ່ແນ່ນອນ ແລະ ປະຕິບັດຕາມຂັ້ນຕອນທີ່ໄດ້ກຳນົດຕາມມາດຕະຖານສາກົນ ທັງນີ້ກໍ່ເພື່ອເປັນການປົກປ້ອງສິດຜົນປະໂຫຍດອັນຊອບທຳຂອງຜູ້ຊົມໃຊ້, ຮັບປະກັນຄວາມປອດໄພຕໍ່ຊິວິດ, ສັງຄົມ, ສິ່ງແວດລ້ອມ, ສ້າງຄວາມເຊື່ອໝັ້ນໃຫ້ແກ່ອົງກອນຕ່າງໆທາງພາຍໃນ ແລະ ສາກົນ.
ເວົ້າລວມແລ້ວວຽກງານດັ່ງກ່າວກໍ່ເປັນອີກໜຶ່ງວຽກງານທີ່ມີບົດບາດສຳຄັນຕໍ່ການພັດທະນາບຸກຄະລາກອນ, ຕໍ່ການຮັບຮອງຄວາມສາມາດຫ້ອງທົດລອງ, ຫ້ອງກວດສອບ, ຫ້ອງສອບທຽບທາງດ້ານເຕັກນິກໃນຂອບເຂດທີ່ໄດ້ຮັບການຮັບຮອງ ແລະ ດ້ານຄຸນນະພາບເພື່ອໃຫ້ລູກຄ້າມີຄວາມໝັ້ນໃຈໃນຄວາມສາມາດຂອງຫ້ອງທົດລອງ, ຫ້ອງກວດສອບ, ຫ້ອງສອບທຽບ, ການບໍລິການ ແລະ ການຍອມຮັບໃນລະດັບດຽວກັບຫ້ອງທົດລອງອື່ນໆທົ່ວໂລກ, ທີ່ໄດ້ຮັບການຮັບຮອງໃນມາດຕະຖານດຽວກັນໂດຍໜ່ວຍງານຮັບຮອງມາດຕະຖານທີ່ໄດ້ລົງນາມເຂົ້າເປັນສະມາຊິກໃນກຸ່ມປະເທດຕ່າງໆໃນພາກພື້ນ ແລະ ສາກົນ.
ຮູບພາບ ແລະ ບົດຂ່າວ: ທ ອໍລະຊຸນ ມະນີ
