ເມື່ອວັນທີ 21-23 ພະຈິກ 2019 ທີ່ຜ່ານມາ ສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ ໄດ້ສົມທົບກັບຄະນະກຳມະການເຕັກນິກແຫ່ງຊາດດ້ານວັດສະດຸກໍ່ສ້າງ ແລະ ພະແນກວິທະຍາສາດ ແລະ ເຕັກໂນໂລຊີ ແຂວງສະຫວັນນະເຂດ ໄດ້ລົງຕິດຕາມກວດກາຄຸນນະພາບຜະລິດຕະພັນປະເພດເຫຼັກເສັ້ນ ທີ່ຜະລິດໂດຍບໍລິສັດ ຄູນຄຳ ສະຕຣີອິນດັສທຣີ ຈຳກັດຜູ້ດຽວ, ຕັ້ງຢູ່ບ້ານ ອຸດົມວິໄລ, ເມືອງ ໄກສອນພົມວິຫານ, ແຂວງສະຫວັນນະເຂດ. ນໍາພາໂດຍ ທ່ານ ສູນທອນ ຈັນທະເດດ ຮອງຫົວໜ້າສູນຢັ້ງຢືນມາດຕະຖານ ແລະ ກວດກາຄຸນນະພາບ ແຫ່ງຊາດ.
ເພື່ອລົງຊຸກຍູ້ການຜະລິດໃຫ້ຖືກຕ້ອງຕາມຂັ້ນຕອນໃນການອອກອະນຸຍາດນໍາໃຊ້ກາໝາຍມາດຕະຖານແຫ່ງຊາດກັບຜະລິດຕະພັນເຫຼັກເສັ້ນ 01 ປະເພດຂອງບໍລິສັດດັ່ງກ່າວຄື:
ປະເພດ(Class): ເຫຼັກເສັ້ນເສີມເບຕົງ.
ຊະນິດ ປະເພດ(Type): ເຫຼັກເສັ້ນປ້ອງອ້ອຍ.
ຂະໜາດ(Size): ø10mm, ø12mm, ø14mm, ø16mm, ø20mm, ø25mm.
ຊັ້ນ (Grade): SD40.
ໃນການຈັດຕັ້ງປະຕິບັດເບື້ອງຕົ້ນແມ່ນໄດ້ລົງກວດກາຕົວຈິງຢູ່ໂຮງງານ, ໂດຍສະເພາະແມ່ນການກວດກາທາງດ້ານເອກະສານ, ກວດກາເບີ່ງຂະບວນການຜະລິດຕົວຈີງ ແລະ ສຸ່ມເກັບເອົາຕົວຢ່າງມາກວດສອບຢູ່ຫ້ອງທົດລອງເພື່ອສົມທຽບໃສ່ກັບມາດຕະຖານແຫ່ງຊາດ ເພື່ອເປັນບ່ອນອີງໃນການຄົ້ນຄວ້າ ແລະ ພິຈາລະນາກ່ອນການອອກອະນຸຍາດນໍາໃຊ້ກາໝາຍມາດຕະຖານແຫ່ງຊາດ ໃຫ້ແກ່ຜະລິດຕະພັນຂອງບໍລິສັດດັ່ງກ່າວ.
ຮູບພາບ ແລະ ບົດຂ່າວ: ອໍລະຊຸນ ມະນີ
