ໃນວັນທີ 10 ກໍລະກົດ 2020 ພະແນກມາດຕະຖານ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມຄົ້ນຄວ້າ, ປຶກສາຫາລື ແລະ ປະກອບຄຳເຫັນໃສ່ບັນດາລາຍຊື່ມາດຕະຖານອຸປະກອນເຄື່ອງໃຊ້ໄຟຟ້າ-ເອເລັກໂຕຣນິກຂອງສາກົນ (IEC) ທີ່ຈະຮັບຮອງເອົາມາເປັນມາດຕະຖານແຫ່ງຊາດລາວ ໃນຂັ້ນຄະນະກຳມະການເຕັກນິກແຫ່ງຊາດ, ຢູ່ທີ່ ຫ້ອງປະຊຸມຊັ້ນ 2 ຂອງກົມມາດຕະຖານ ແລະ ວັດແທກ.
ໃຫ້ກຽດເປັນປະທານດຳເນີນກອງປະຊຸມ, ໂດຍທ່ານ ວັນໄຊ ແມັກສະຣິກ ຫົວໜ້າໜ່ວຍງານຄະນະກຳມະການເຕັກນິກແຫ່ງຊາດ ດ້ານຜະລິດຕະພັນອຸປະກອນໄຟຟ້າ – ເອເລັກໂຕຣນິກ, ໂດຍມີບັນດາຄະນະກຳມະການເຕັກນິກແຫ່ງຊາດ, ຜູ້ຕາງໜ້າຈາກພາກສ່ວນຕ່າງໆເຊັ່ນ: ມະຫາວິທະຍາໄລແຫ່ງຊາດ, ບັນດາກະຊວງ, ຂະແໜງການທີ່ກ່ຽວຂ້ອງ ແລະ ບັນດາບໍລິສັດ ພ້ອມດ້ວຍພະນັກງານ ແລະ ກອງເລຂາ ເຂົ້າຮ່ວມ ຈຳນວນ 45 ທ່ານ.
ໃນວາລະການດຳເນີນກອງປະຊຸມ ກອງເລຂາຄະນະກຳມະການເຕັກນິກແຫ່ງຊາດ ໄດ້ລາຍງານສະພາບລວມກ່ຽວກັບຈຸດປະສົງຂອງກອງປະຊຸມຄັ້ງນີ້ເຊິ່ງ ໄດ້ຍົກໃຫ້ເຫັນບົດບາດຄວາມສຳຄັນຂອງວຽກງານມາດຕະຖານ ແລະ ວັດແທກ ຕໍ່ການພັດທະນາເສດຖະກິດ-ສັງຄົມ, ສປປ ລາວ ພວກເຮົາເຫັນໄດ້ວ່າ ເກີດມີການໄຫຼວຽນຂອງສິນຄ້າ ແລະ ການບໍລິການລະຫວ່າງປະເທດສະມາຊິກດ້ວຍກັນຢ່າງເສລີ ທັງລະດັບພາກພື້ນກໍ່ຄືສາກົນ ລວມທັງ ສປປ ລາວ ເຮົາເອງ. ສະນັ້ນ, ພະແນກມາດຕະຖານ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ໃນນາມກອງເລຂາ ຈຶ່ງໄດ້ມີການສຶກສາຄົ້ນຄວ້າ ແລະ ຄັດເລືອກບັນດາມາດຕະຖານ ຂອງອຸປະກອນເຄື່ອງໃຊ້ໄຟຟ້າ ແລະ ເອເລັກໂຕຼນິກສາກົນ (IEC) ມາເປັນມາດຕະຖານແຫ່ງຊາດ ຈໍານວນ 50 ມາດຕະຖານ ແມ່ນມີຈຸດປະສົ່ງ ເພື່ອເປັນບ່ອນອີງໃນ ການຊຸກຍູ້ສົ່ງເສີມ, ການຄຸ້ມຄອງ, ກວດກາຜະລິດຕະພັນອຸປະກອນເຄື່ອງໃຊ້ໄຟຟ້າ ແລະ ເອເລັກ ໂຕຼນິກທີ່ຜະລິດ, ນໍາເຂົ້າ ແລະ ຈໍາໜ່າຍຢູ່ ສປປ ລາວ ໃຫ້ໄດ້ມາດຕະຖານ ແລະ ເພື່ອເຊື່ອມໂຍງກັບ ບັນດາມາດຕະຖານຂອງພາກພື້ນ (ອາຊຽນ) ແລະ ສາກົນ ແລະ ເພື່ອຍັງເປັນການປົກປ້ອງຜູ້ບໍລິໂພກ ໃຫ້ໄດ້ໃຊ້ຜະລິດຕະພັນທີ່ມີຄຸນນະພາບ, ມີຄວາມປອດໄພ ແລະ ຮັບປະກັນຕໍ່ຊີວິດ ແລະ ສັບສິນອີກ ດ້ວຍ.
ບັນຊີລາຍການຈໍານວນ 50 ມາດຕະຖານນີ້ແມ່ນໄດ້ສັງລວມຂໍ້ມູນ ແລະ ຄັດເລືອກຈາກ ບັນຊີລາຍຊື່ຂອງຜະລິດຕະພັນສິນຄ້າທີ່ກ່ຽວກັບອຸປະກອນເຄື່ອງໃຊ້ໄຟຟ້າເອເລັກໂຕຼນິກ ທີ່ໄດ້ນໍາ ເຂົ້າຕົວຈິງ, ແລະ ໄດ້ຈາກການຜະລິດ, ຈໍາໜ່າຍ ແລະ ຖືກນໍາໃຊ້ຕົວຈິງຢູ່ໃນສັງຄົມ.
ພາຍຫຼັງຄະນະກໍາມະການເຕັກນິກແຫ່ງຊາດເຫັນດີໃຫ້ຮັບຮອງ, ກອງເລຂາຈະໄດ້ສົ່ງບັນຊີລາຍ ການທີ່ຈະຮັບຮອງດັ່ງກ່າວນີ້ ລົງໃນເວັບໄຊ ຂອງກົມ ແລະ ກະຊວງການຄ້າເພື່ອໃຫ້ສາທາລະນະຊົນ ປະກອບຄໍາເຫັນຕື່ມເປັນໄລຍະເວລາ 2 ເດືອນ ຫຼື 60 ວັນ. ຫຼັງຈາກນັ້ນ, ກອງເລຂາຈະໄດ້ສັງ ລວມຂໍ້ມູນ ເພື່ອນໍາສະເໜີຕໍ່ສະພາມາດຕະຖານແຫ່ງຊາດເພື່ອຮັບຮອງ ແລະ ປະກາດໃຊ້ຢ່າງເປັນ ທາງການ.
