ໃນວັນທີ22 ມິຖຸນາ 2020 ສູນວັດແທກ, ກົມມາດຕະຖານ ແລະ ວັດແທກ ໄດ້ສົມທົບກັບພະແນກວິທະຍາສາດ ແຂວງ ບໍລິຄຳໄຊ ລົງຕິດຕາມກວດສອບປະລິມານສຸດທິບັນຈຸໃນສິນຄ້າຫຸ້ມຫໍ່ຂອງ 2 ໂຮງງານທີ່ຜະລິດແປ້ງມັນຕົ້ນ, ໂດຍໃນຕອນເຊົ້າແມ່ນໄດ້ກວດສອບຢູ່ ບໍລິສັດ ລາວທີທີແອວ ພັດທະນາກະສິກຳ ແລະ ອຸດສາຫະກຳ ຈຳກັດ ຕັ້ງຢູ່ບ້ານໂນນສົມບູນ ເມືອງບໍລິຄັນ ແຂວງບໍລິຄຳໄຊ ແລະ ໃນຕອນບ່າຍແມ່ນໄດ້ສືບຕໍ່ລົງກວດສອບຢູ່ທີ່ ບໍລິສັດ ຄາສະວາດຣາກອນ ຈຳກັດ ຕັ້ງຢູ່ ບ້ານນາຊວງ ເມືອງວຽງທອງ ແຂວງບໍລິຄຳໄຊ. ເຊີ່ງໄດ້ທຳການກວດສອບ ດ້ວຍການຊັ່ງປະລິມານສຸດທິບັນຈຸຂອງແປ້ງມັນຕົ້ນ ຂະໜາດ 50 ກິໂລກຼາມ.
ຜ່ານການກວດສອບຂອງຄະນະກຳມະການ ເຫັນວ່າທັງສອງບໍລິສັດດັ່ງກ່າວແມ່ນຍັງສາມາດປະຕິບັດຕາມລະບຽບການໄດ້ດີ ເຊີ່ງບໍລິມາດທີ່ບັນຈຸແມ່ນໄດ້ຕາມມາດຕະຖານທີ່ກຳນົດໄວ້.
ຕໍ່ກັບວຽກງານດັ່ງກ່າວ ທາງກົມມາດຕະຖານ ແລະ ວັດແທກ ແມ່ນຈະໄດ້ມີການລົງຕິດຕາມກວດສອບທຸກໆປີ ທັງນີ້ກໍ່ເພື່ອປະຕິບັດຕາມ ລະບຽບການ, ຫຼັກການກວດສອບສິນຄ້າຫຸ້ມຫໍ່, ແລະ ມາດຕະການກ່ຽວກັບການຄຸ້ມຄອງ, ກວດສອບຜະລິດຕະພັນ ແລະ ສິນຄ້າຫຸ້ມຫໍ່ທີ່ຜະລິດ, ນຳເຂົ້າ, ສົ່ງອອກ ແລະ ຈຳໜ່າຍຢູ່ ສປປ ລາວ ໃຫ້ຖືກຕ້ອງຕາມລະບຽບການທີ່ກຳນົດໃວ້ ຢູ່ ສປປ ລາວ ແລະ ສາກົນ ເພື່ອສ້າງເງື່ອນໄຂອັນສະດວກໃນການຊື້-ຂາຍ, ແນໃສ່ເຮັດໃຫ້ສັງຄົມມີຄວາມຍຸດຕິທຳ, ປອດໄພ ແລະ ມີຄວາມເປັນເອກະພາບໃນການຈັດຕັ້ງປະຕິບັດ ໃນຂອບເຂດທົ່ວປະເທດ ແລະ ເຊື່ອມໂຍງກັບຫຼັກການກວດສອບຂອງພາກພື້ນ ແລະ ສາກົນ, ເພື່ອບໍ່ໃຫ້ເອົາປຽບລະຫວ່າງຜູ້ຊື້ ແລະ ຜູ້ຂາຍ ແລະ ລະຫວ່າງໂຮງງານກັບໂຮງງານ.
ຮູບພາບ ແລະ ບົດຂ່າວ: ສູນວັດແທກ
