ໃນວັນທີ 16–17 ທັນວາ 2020ນີ້, ພະແນກມາດຕະຖານ, ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມ “ຄົ້ນຄວ້າ, ປຶກສາຫາລື ແລະ ເປັນເອກະພາບ ເພື່ອຮັບຮອງເອົາຮ່າງມາດຕະຖານ ໄຟຟ້າ-ເອເລັກໂຕຼນິກສາກົນ ມາເປັນມາເປັນມາດຕະຖານແຫ່ງຊາດ, ຮ່າງບັນຊີລາຍການມາດຕະຖານສະມັກໃຈທີ່ຈະຖືກປະກາດໃຊ້ເປັນມາດຕະຖານແບບບັງຄັບ ເພື່ອເປັນມາດຕະຖານແຫ່ງຊາດ ໃນຂັ້ນສະພາມາດຕະຖານແຫ່ງຊາດ ແລະ ກອງປະຊຸມສາມັນປະຈຳປີຂອງສະພາມາດຕະຖານແຫ່ງຊາດ”. ທີ່ຫ້ອງປະຊຸມໂຮງແຮມທະວີສຸກ, ເມືອງວັງວຽງ, ແຂວງວຽງຈັນ. ໃຫ້ກຽດເປັນປະທານຂອງ ທ່ານ ບຸນຕີ ທະມິດ ປະທານສະພາມາດຕະຖານແຫ່ງຊາດ, ຮອງລັດທະມົນຕີກະຊວງວິທະຍາສາດ ແລະ ເຕັກໂນໂລຊີ, ພ້ອມດ້ວຍຮອງປະທານ ແລະ ຄະນະສະພາມາດຕະຖານແຫ່ງຊາດ, ຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ບໍລິສັດ ພ້ອມດ້ວຍພະນັກງານວິຊາການ ເຂົ້າຮ່ວມ ຈຳນວນ 35 ກວ່າທ່ານ.
ຈຸດປະສົງຂອງການປະຊຸມ ຄັ້ງນີ້ ແມ່ນເພື່ອແນໃສ່ “ຄົ້ນຄວ້າ, ປຶກສາຫາລື ແລະ ເປັນເອກະພາບ ເພື່ອຮັບຮອງເອົາຮ່າງມາດຕະຖານ ໄຟຟ້າ-ເອເລັກໂຕຼນິກສາກົນ (IEC) ຈໍານວນ 54 ລາຍການ, ຮ່າງບັນຊີລາຍການມາດຕະຖານສະມັກໃຈທີ່ຈະຖືກປະກາດໃຊ້ເປັນມາດຕະຖານແບບບັງຄັບໃນ 3 ຂົງເຂດຜະລິດຕະພັນເຊັ່ນ: ຜະລິດຕະພັນນ້ຳມັນເຊື້ອໄຟ ແລະ ອາຍແກັດ, ຜະລິດຕະພັນໄຟຟ້າ-ເອເລັກໂຕຼນິກ ແລະ ຜະລິດຕະພັນວັດສະດຸກໍ່ສ້າງ ເພື່ອເປັນມາດຕະຖານແຫ່ງຊາດ ຈຳນວນ 111 ລາຍການ ໃນຂັ້ນສະພາມາດຕະຖານແຫ່ງຊາດ. ການປະຊຸມໃນຄັ້ງນີ້ ແມ່ນໄດ້ອີງຕາມສະພາບການຕົວຈິງໃນປັດຈຸບັນເຫັນວ່າ 3 ຂົງເຂດຜະລິດຕະພັນມີຜົນກະທົບຕໍ່ກັບຄວາມປອດໄພທາງດ້ານສຸຂະພາບຂອງຄົນ, ເສດຖະກິດສັງຄົມ ແລະ ສິ່ງແວດລ້ອມ ເຖີງແມ່ນວ່າຜ່ານມາໄດ້ມີມາດຕະຖານແຫ່ງຊາດແລ້ວກໍ່ຕາມ ແຕ່ວ່າມາດຕະຖານດັ່ງກ່າວເປັນມາດຕະຖານແບບສະມັກໃຈ, ເຮັດໃຫ້ບາງໂຮງຈັກໂຮງງານ, ຜູ້ຜະລິດ ຫຼື ຜູ້ນຳເຂົ້າ-ສົ່ງອອກຍັງບໍ່ສອດຄ່ອງຕາມລະບຽບການ, ມາດຕະຖານ ແລະ ຄຸນນະພາບ ແລະ ມີຜົນກະທົບຕໍ່ເສດຖະກິດສັງຄົມ ແລະ ສິ່ງແວດລ້ອມ ກໍ່ຄືຜູ້ຊົມໃຊ້. ດ້ວຍຄວາມຮັບຜິດຊອບຢ່າງສູງກໍ່ໄດ້ພ້ອມກັນສຸມໃສ່ປະກອບຄຳຄິເຫັນເພື່ອເຮັດໃຫ້ຮ່າງມາດຕະຖານ ສະບັບນີ້ໃຫ້ສົມບູນ.
ໂອກາດດັ່ງກ່າວ, ຍັງໄດ້ເປີດກອງປະຊຸມສາມັນປະຈຳປີ ຂອງສະພາມາດຕະຖານແຫ່ງຊາດ ປະຈຳປີ ຈຸດປະສົງຂອງກອງປະຊຸມໃນມື້ນີ້ແມ່ນເພື່ອເປັນການທົບທວນຄືນກ່ຽວກັບການຈັດຕັ້ງປະຕິບັດ ແລະ ເຄື່ອນໄຫວວຽກງານຂອງມາດຕະຖານແຫ່ງຊາດໃນໄລຍະ 03 ທີ່ຜ່ານມາ, ກົນໄກການເຄື່ອນໄຫວວຽກງານ ແລະ ຍັງມີວຽກງານດ້ານການຮ່ວມມືກັບອົງການຈັດຕັ້ງຕ່າງໆຂອງອາຊຽນ, ພາກພື້ນ ແລະ ສາກົນ. ແລະ ຍັງໄດ້ແນ່ໃສ່ການປຶກສາຫາລືກ່ຽວກັບແຜນການເຄື່ອນໄຫວວຽກງານປະຈໍາປີ ເຊິ່ງມີທັງຂໍ້ສະດວກ, ບັນຫາ, ສິ່ງທ້າທາຍ ແລະ ການແກ້ໄຂບັນຫາຂໍ້ຄົງຄ້າງຕ່າງໆຂອງການເຄື່ອນໄຫວວຽກງານໃນໄລຍະຜ່ານມາ ເພື່ອເປັນການປັບປຸງວຽກງານແຜນການເຄື່ອນໄຫວໄລຍະ 03 ໃນຕໍ່ໜ້າຂອງສະພາມາດຕະຖານພວກເຮົາໃຫ້ນັບມື້ນັບດີຂຶ້ນ.
ກອງປະຊຸມໃນຄັ້ງນີ້ໄດ້ປຶກສາຫາລື ແລະ ສາມາດສັງລວມເນື້ອໃນໄດ້ດັ່ງນີ້:
ສະພາມາດຕະຖານແຫ່ງຊາດ ສະໄໝປະຈຸບັນມີໂຄງຮ່າງປະກອບມີ ປະທານ, ຮອງປະທານ, ຄະນະກໍາມະການທັງໝົດ 35 ທ່ານ ທີ່ໄດ້ເປັນຜູ້ຕາງໜ້າມາຈາກກະຊວງ, ຂະແໜງການ ທີ່ກ່ຽວຂ້ອງຕ່າງໆ ເພື່ອຮ່ວມກັນດຳເນີນການເຄື່ອນໄຫວຕາມພາລະບົດບາດ ຂອງຕົນທີ່ໄດ້ກຳນົດໄວ້ ເປັນຕົ້ນໄດ້ປະກອບສ່ວນໃນການສ້າງບັນດານິຕິກຳຕ່າງໆ. ສະພາມາດຕະຖານແຫ່ງຊາດ ໄດ້ແຕ່ງຕັ້ງ 17 ຄະນະກໍາມະການເຕັກນິກແຫ່ງຊາດໃນແຕ່ລະຂົງເຂດຜະລິດຕະພັນ ເພື່ອເປັນເງື່ອນໄຂສຳລັບການເຊື່ອມໂຍງກັບອົງການຈັດຕັ້ງຕ່າງໆຂອງພາກພື້ນ ແລະ ສາກົນ. ນອກນັ້ນຍັງໄດ້ມີການສ້າງ, ດັດແກ້ ແລະ ຮັບຮອງເອົາມາດຕະຖານແຫ່ງຊາດເຊິ່ງລວມກັບຈຳນວນມາດຕະຖານທີ່ປະກາດໃຊ້ຢ່າງເປັນທາງການມີທັງໝົດ 442 ມາດຕະຖານແຫ່ງຊາດໃນຂົງເຂດຜະລິດຕະພັນຕ່າງໆ ແລະ ຍັງສາມາດຂຶ້ນທະບຽນກວດກາ, ຄຸນນະພາບຜະລິດຕະພັນ ແລະ ສິນຄ້າໄດ້ຈໍານວນ 111 ລາຍການ ແລະ ຍັງສາມາດອະນຸຍາດໃຫ້ບໍລິສັດນໍາໃຊ້ກາໝາຍມາດຕະຖານໄດ້ຈໍານວນ 38 ລາຍການ ໂດຍສະເພາະແມ່ນການຍົກລະດັບການເປັນສະມາຊິກອົງການມາດຕະຖານສາກົນ ຫຼື ISO ຈາກ ສະມາຊິກຜູ້ສັງເກດການ ເປັນ ສະມາຊິກເຄິ່ງສົມບູນ ແລະ ຍັງໄດ້ເຊັນສັນຍາຮ່ວມມືກັບອົງການມາດຕະຖານຂອງປະເທດສະຫະລັດອາເມລິກາ ຫຼື ASTM ແລະ ຍັງໄດ້ເຂົ້າຮ່ວມຢູ່ໃນຄະນະກຳມະທິການເຕັກນິກດ້ານໄຟຟ້າ-ເອເລັກໂຕຣນິກປະຈຳພາກພື້ນອາຊຽນ, ໜ່ວຍງານວັດສະດຸກໍ່ສ້າງອາຊຽນ. ນອກນັ້ນ ຍັງເຂົ້າຮ່ວມການເຄື່ອນໄຫວກັບຄະນະກໍາມະການທີ່ປຶກສາທາງດ້ານມາດຕະຖານ ແລະ ຄຸນນະພາບອາຊຽນ ຫຼື ACCSQ ກໍ່ຄືໜ່ວຍງານວິຊາການດ້ານຕ່າງໆ ທີ່ໄດ້ເຂົ້າຮ່ວມເປັນປະຊາຄົມເສດຖະກິດ ອາຊຽນ ຫຼື AEC.
ຮູບພາບ ແລະ ບົດຂ່າວ: ພະແນກມາດຕະຖານແຫ່ງຊາດ
