ໃນຕອນເຊົ້າຂອງວັນທີ 2 ພະຈິກ 2021 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ໄດ້ເປີດກອງປະຊຸມໃຫຍ່ຜູ້ແທນອົງຄະນະພັກ ກະຊວງອຸດສາຫະກຳ ແລະ ການຄ້າ ຄັ້ງທີ V ຂຶ້ນ, ໂດຍການເປັນປະທານ ຂອງ ສະຫາຍ ປອ ຄໍາແພງ ໄຊສົມແພງ ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ.
ເຂົ້າຮ່ວມໃນກອງປະຊຸມ ມີ ຜູ້ແທນສົມບູນ ຈາກບັນດາຮາກຖານພັກອ້ອມຂ້າງກົມ, ຫ້ອງການ, ສະຖາບັນ, ສະພາການຄ້າ ແລະ ອຸດສາຫະກໍາ ແຫ່ງຊາດ ແລະ ບັນດາຫົວໜ່ວຍວິສາຫະກິດ ທີ່ຂຶ້ນກັບອົງຄະນະພັກກະຊວງອຸດສາຫະກໍາ ແລະ ການຄ້າ ຈໍານວນ: 199 ສະຫາຍ, ເຊິ່ງເປັນຕົວແທນ ໃຫ້ແກ່ສະມາຊິກພັກທົ່ວອົງຄະນະພັກກະຊວງອຸດສາຫະກຳ ແລະ ການຄ້າ ໃນຈຳນວນ 656 ສະຫາຍ.
ກອງປະຊຸມຄັ້ງນີ້ຍັງໄດ້ຮັບກຽດເຂົ້າຮ່ວມ ຈາກ ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ. ໃນກອງປະຊຸມ ສະຫາຍ ປອ ຄໍາແພງ ໄຊສົມແພງ ກໍາມະການສູນກາງພັກ, ເລຂາຄະນະໍລິຫານງານພັກ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ຂຶ້ນອ່ານຜ່ານ ຮ່າງລາຍງານການເມືອງຕໍ່ກອງປະຊຸມ, ເຊິ່ງເປັນການຜັນຂະຫຍາຍມະຕິສະໄໝທີ X ຂອງພັກ ແລະ ແຜນ VIII ຂອງລັດ ເຂົ້າສູ່ວຽກງານຕົວຈິງຂອງອົງຄະນະພັກກະຊວງອຸດສາຫະກໍາ ແລະ ການຄ້າ.
ໃນຮ່າງລາຍງານການເມືອງ ແມ່ນໄດ້ສະຫຼຸບຕີລາຄາຄືນ ຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງ ອຸດສາຫະກຳ ແລະ ການຄ້າ ໄລຍະ 5 ປີ (2016-2020) ໂດຍເຫັນໄດ້ຜົນສຳເລັດໃນແຕ່ລະດ້ານທີ່ພົ້ນເດັ່ນ ດັ່ງນີ້:
ວຽກງານການເມືອງ-ແນວຄິດ ແມ່ນຕີລາຄາໄດ້ວ່າຖັນແຖວພະນັກງານ-ສະມາຊິກພັກ ມີຄວາມເຊື່ອໝັ້ນຕໍ່ການນຳພາຂອງພັກ, ມີນ້ຳໃຈຮັກຊາດ ແລະ ຮັກລະບອບໃໝ່, ສະມາຊິກພັກ ແລະ ພະນັກງານລັດຖະກອນໂດຍລວມ ຍັງຮັກສາໄດ້ຄຸນທາດການເມືອງ ແລະ ຄຸນສົມບັດສິນທຳປະຕິວັດ, ມີຄວາມອົດທົນ, ເສັຍສະຫຼະເພື່ອປະໂຫຍດສ່ວນລວມ, ນັບຖືການຈັດຕັ້ງ ແລະ ມີຄວາມສາມັກຄີຮັກແພງຊ່ວຍເຫຼືອຊຶ່ງກັນ ແລະ ກັນ. ວຽກງານການກໍ່ສ້າງພັກ ແມ່ນໄດ້ເອົາໃຈໃສ່ວຽກງານຂະຫຍາຍສະມາຊິກ ໂດຍຖືເອົາດ້ານຄຸນນະພາບເປັນກົກ ມາຮອດປັດຈຸບັນທົ່ວອົງຄະນະພັກມີສະມາຊິກພັກທັງໝົດ 742 ສະຫາຍ (ຍິງ 255 ສະຫາຍ), ສະມາຊິກທີ່ໄດ້ຮັບການຂະຫຍາຍໃນລະຫວ່າງສະໄໝກອງປະຊຸມໃຫຍ່ຄັ້ງທີ IV ແລະ ທີ V ມີ 162 ສະຫາຍ, (ຍິງ 72 ສະຫາຍ).
ການປັບປຸງກົງຈັກການຈັດຕັ້ງລັດ: ປັດຈຸບັນໂຄງປະກອບການຈັດຕັ້ງຂັ້ນກະຊວງປະກອບມີ 1 ຫ້ອງການ, 12 ກົມ ແລະ 1 ສະຖາບັນ; ຂັ້ນພະແນກອຸດສາຫະກຳ ແລະ ການຄ້າຂັ້ນນະຄອນຫຼວງ ແລະ ແຂວງ ມີ 9 ຂະແໜງ; ຫ້ອງການ ອຄ ຂັ້ນເມືອງ/ນະຄອນ ມີ 5 ໜ່ວຍງານ. ມີພະນັກງານລັດຖະກອນ ທົ່ວຂະແໜງອຸດສາຫະກຳ ແລະ ການຄ້າ ທັງໝົດ 2.918 ກ່ວາຄົນ, ໃນນັ້ນຍິງ 910 ຄົນ.
ການຕີລາຄາຜົນການນໍາພາວຽກງານວິຊາສະເພາະ ຂອງຄະນະພັກກະຊວງໃນສະໄໝທີ IV ຜ່ານມາມີຄື: ການນຳພາດ້ານວິຊາສະເພາະຕາມ 3 ແຜນນະໂຍບາຍທີ່ວາງອອກ ໃນກອງປະຊຸມໃຫຍ່ຄັ້ງທີ IV ຂອງຂະແໜງອຸດສາຫະກໍາ ແລະ ການຄ້າ ມີ:
- ການເຊື່ອມໂຍງກັບເສດຖະກິດ ຂອງພາກພື້ນ ແລະ ສາກົນຢ່າງເປັນເຈົ້າການ: ໄດ້ຍົກໃຫ້ເຫັນຄວາມພະຍາຍາມ ແລະ ຜົນຮັບ ຂອງການເຈລະຈາການຄ້າໃນຂອບຕ່າງໆເປັນຕົ້ນ ໃນກອບ WTO, ກອບອາຊຽນ ແລະ ຂອບການຮ່ວມມືການຄ້າໃນລະດັບອະນຸພາກພື້ນ ແລະ ລະດັບສອງຝ່າຍ.
- ການສ້າງສະພາບແວດລ້ອມທີ່ເອື້ອອຳນວຍໃຫ້ແກ່ພາກທຸລະກິດ: ໄດ້ມີການປັບປຸງ ແລະ ສ້າງນິຕິກຳໃໝ່ ຫຼາຍສະບັບ ເພື່ອເປັນເຄື່ອງມືພັດທະນາວຽກງານທະບຽນ ແລະ ຄຸ້ມຄອງວິສາຫະກິດ ໃຫ້ມີຄວາມສະດວກວ່ອງໄວ ງ່າຍດາຍ ແລະ ເປັນເອກະພາບ, ການປັບປຸງລະບຽບການ ແລະ ກົນໄກປະສານງານ ໃນການດຳເນີນທຸລະກິດ ຢູ່ ສປປ ລາວ ມາຮອດປັດຈຸບັນ ການຫລຸດຂັ້ນຂອດທີ່ບໍ່ຈຳເປັນ, ສາມາດຫລຸດເວລາ ແລະ ຄ່າໃຊ້ຈ່າຍສິ້ນເປືອງ ຂອງພາກທຸລະກິດລົງໄດ້ຢ່າງເປັນຮູບປະທຳ.
- ການສ້າງຄວາມພ້ອມແກ່ພາກທຸລະກິດ ເພື່ອຮອງຮັບກັບການແຂ່ງຂັນທີ່ເພີ່ມຂຶ້ນຢ່າງຍືນຍົງ: ແມ່ນໄດ້ແກ້ໄຂຂໍ້ຈຳກັດ ຂອງການຜະລິດເປັນສິນຄ້າພາຍໃນປະເທດ. ບັນຫາການເປີດຕະຫຼາດໃຫ້ສິນຄ້າ ຂອງລາວສາມາດເຂົ້າສູ່ຕະຫຼາດ ຂອງປະເທດຄູ່ຄ້າຕ່າງໆໄດ້ ໂດຍບໍ່ຖືກກີດກັນດ້ວຍກຳແພງພາສີ ແລະ ສະພາບແວດລ້ອມທີ່ເອື້ອອຳນວຍແກ່ການສ້າງຕັ້ງ ແລະ ດຳເນີນທຸລະກິດ. ການສ້າງຄວາມພ້ອມແກ່ພາກທຸລະກິດ ເຊັ່ນ: ການສົ່ງເສີມວິສາຫະກິດຂະໜາດນ້ອຍ ແລະ ກາງ, ການສົ່ງເສີມການຄ້, ການສົ່ງເສີມອຸດສາຫະກໍາປຸງແຕ່ງ ແລະ ຫັດຖະກໍາ, ການສົ່ງເສີມຜະລິດເປັນສິນຄ້າ ແລະ ຄໍ້າປະກັນສະບຽງອາຫານ.ຈາກຜົນການຈັດຕັ້ງປະຕິບັດວຽກງານທັງໝົດ ສາມາດສະແດງອອກເຖິງຜົນງານທີ່ເປັນການປະຕິບັດຕົວເລກຄາດໝາຍທີ່ໄດ້ວາງໄວ້ ຄື:
– ມູນຄ່າການຜະລິດອຸດສາຫະກໍາປຸງແຕ່ງ ແລະ ຫັດຖະກໍາ 5 ປີບັນລຸໄດ້ປະມານ 52.728 ຕື້ກີບ, ທຽບໃສ່ໄລຍະດຽວກັນ (2011-2015) ເພີ່ມຂຶ້ນ 80,1%, ລື່ນແຜນ 8,9%, ອັດຕາເພີ່ມຂຶ້ນສະເລ່ຍ 9,2% ຕໍ່ປີ.
– ມູນຄ່າຈໍລະຈອນສິນຄ້າ (ຂາຍຍົກ-ຂາຍຍ່ອຍ ແລະ ບໍລິການສ້ອມແປງລົດ) ບັນລຸໄດ້ປະມານ 285.153 ຕື້ກີບ, ທຽບໃສ່ໄລຍະດຽວກັນ (2011-2015) ເພີ່ມຂຶ້ນ 85,7%, ຫຼຸດແຜນ -2,1%, ອັດຕາເພີ່ມຂຶ້ນສະເລ່ຍ 10,2% ຕໍ່ປີ.
– ມີຕະຫຼາດຂາຍຍົກ-ຂາຍຍ່ອຍສິນຄ້າໃນຂອບເຂດທົ່ວປະເທດ ທັງໝົດ 843 ແຫ່ງ (ປີ 2020) ທຽບໃສ່ປີ 2015 ແມ່ນເພີ່ມຂຶ້ນ 15,6%. (ຄາດໝາຍ 5 ປີ ແມ່ນ 30%)
– ມູນຄ່າການນໍາເຂົ້າ ບັນລຸໄດ້ປະມານ 26.547 ລ້ານໂດລາ, ທຽບໃສ່ໄລຍະດຽວກັນ (2011-2015) ເພີ່ມຂຶ້ນ 50%, ລື່ນແຜນ 3,9%, ອັດຕາເພີ່ມສະເລ່ຍ 7,8% ຕໍ່ປີ.
– ມູນຄ່າການສົ່ງອອກ ບັນລຸໄດ້ປະມານ 26.429 ລ້ານໂດລາ, ທຽບໃສ່ໄລຍະດຽວກັນ (2011-2015) ເພີ່ມຂຶ້ນ 83%, ລື່ນແຜນ 2,1%, ການສົ່ງອອກສິນຄ້າອຸດສາຫະກຳປຸງແຕ່ງແມ່ນກວມເອົາປະມານ 43%, ລະດັບການເປີດຕົວ ຂອງການຄ້າສິນຄ້າກັບສາກົນ (ບໍ່ລວມບໍລິການ) ບັນລຸໄດ້ 61,5%. ໃນຮ່າງລາຍງານການເມືອງ ຍັງໄດ້ເບິ່ງຄືນ ແລະ ເຫັນໄດ້ບາງຈຸດອ່ອນ, ຂໍ້ຄົງຄ້າງ ເປັນຕົ້ນ:
ດ້ານວຽກງານພັກ-ພະນັກງານ-ການສຶກສາອົບຮົບການເມືອງ-ແນວຄິດ ຍັງບໍ່ທັນໄດ້ຕິດພັນກັບຂະບວນການວຽກງານຕົວຈິງໃນໄລຍະໃໝ່ເທົ່າທີ່ຄວນ. ການຄຸ້ມຄອງ ບັງຄັບໃຊ້ລະບຽບການ ແລະ ກົດໝາຍໃນຂະແໜງການອຸດສາຫະກຳ ແລະ ການຄ້າ ຍັງບໍ່ທັນມີຄວາມສັກສິດເທົ່າທີ່ຄວນ. ການຄົ້ນຄວ້ານະໂຍບາຍ ນິຕິກຳ ແລະ ວິທະຍາສາດ-ວິທະຍາການ ໃນການຄຸ້ມຄອງຂະແໜງການຕົນ ຍັງບໍ່ທັນສົມຄູ່ກັບລະດັບການຂະຫຍາຍຕົວຂອງພາກການຜະລິດ-ທຸລະກິດ. ການສ້າງຊັບພະຍາກອນມະນຸດຕາມທິດນຳໃນການສ້າງບາດກ້າວບຸກທະລຸ ດ້ານການພັດທະນາ ຍັງເຮັດໄດ້ໜ້ອຍ
ການປະກອບສ່ວນຕໍ່ລວມຍອດຜະລິດຕະພັນພາຍໃນ ຂອງ ຂະແໜງອຸດສາຫະກຳ ແລະ ການຄ້າ ຍັງບໍ່ໄດ້ຄາດໝາຍທີ່ຕັ້ງໄວ້. ການຊຸກຍູ້ການຜະລິດເປັນສິນຄ້າຕາມພາລະບົດບາດ ຍັງບໍ່ແຂງແຮງ, ຍັງບໍ່ຮັບປະກັນໄດ້ຄວາມໝັ້ນຄົງ ຂອງການສະໜອງສິນຄ້າທີ່ຈຳເປັນແກ່ການຜະລິດ ແລະ ຊີວິດການເປັນຢູ່ ໃນຕະຫຼາດພາຍໃນ ໂດຍສະເພາະເມື່ອຖືກກະທົບຈາກວິກິດການເສດຖະກິດ ຈາກສະພາບການພາຍນອກ ຫຼື ໄພພິບັດທາງທຳມະຊາດ ແລະ ການແຜ່ລະບາດຂອງພະຍາດຕ່າງໆ, ການປົກປ້ອງຜູ້ລົງທຶນ ແລະ ຜູ້ຊົມໃຊ້ຍັງເຮັດບໍ່ທັນໄດ້ດີເທົ່າທີ່ຄວນ. ໂຄງປະກອບສິນຄ້າສົ່ງອອກຍັງບໍ່ຫຼາກຫຼາຍເຮັດໃຫ້ມີຄວາມບອບບາງດ້ານການສົ່ງອອກ. ກອງປະຊຸມຄັ້ງນີ້ ຍັງໄດ້ຜ່ານທິດທາງຫນ້າທີ່ຕົ້ນຕໍໃນ 5 ປີ ຕໍ່ໜ້າ(2021-2025), ເຊິ່ງນໍາສະເໜີໂດຍ ສະຫາຍ ສົມຈິດ ອິນທະມິດ ຄະນະປະຈໍາພັກ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ດັ່ງນີ້:
ແຜນພັດທະນາ 5 ປີຂອງຂະແໜງອຸດສາຫະກຳ ແລະ ການຄ້າ ແມ່ນສຸມໃສ່ຜັນຂະຫຍາຍ 5 ແຜນນະໂຍບາຍຄື:
- ການເຊື່ອມໂຍງ ແລະ ເຊື່ອມຈອດເສດຖະກິດກັບພາກພື້ນ ແລະ ສາກົນແມ່ນ ສຸມໃສ່ການຮ່ວມມື ແລະ ເຈລະຈາການຄ້າຂອບສອງຝ່າຍ, ຫຼາຍຝ່າຍ, ອານຸພາກພື້ນ ແລະ ພາກພື້ນ ເພື່ອເປີດໂອກາດໃຫ້ສາມາດສົ່ງອອກໃຫ້ໄດ້ຫຼາຍຂື້ນ; ສຸມໃສ່ການສົ່ງເສີມ ແລະ ພັດທະນາການຄ້າຊາຍແດນ ແລະ ການບໍລິການ ການຄ້າຜ່ານແດນ ຕິດພັນກັບ Logistic ໃນຍຸກແຫ່ງການເຊື່ອມໂຍງເຊື່ອມຈອດ.
- ການພັດທະນາອຸດສາຫະກໍາ ແລະ ການຜະລິດເປັນສິນຄ້າ ຕິດພັນກັບຕະຫຼາດ ແມ່ນ ສົ່ງເສີມ ແລະ ພັດທະນາກຸ່ມອຸດສາຫະກໍາທີ່ມີຢູ່ໃນປະຈຸບັນ ແລະ ອຸດສາຫະກໍາທີ່ມີທ່າແຮງໃໝ່; ການຜະລິດ ແລະ ການບໍລິໂພກແບບຍືນຍົງ; ການສ້າງມູນຄ່າເພີ່ມ, ຍົກລະດັບຄຸນນະພາບ, ມາດຕະຖານຜະ ລິດຕະພັນ ແລະ ຜະລິດຕະພາບ; ສຸມໃສ່ການພັດທະນາໂຄງລ່າງພື້ນຖານສະໜັບສະໜູນອຸດສາຫະກໍາປຸງແຕ່ງ; ເຂດນິຄົມອຸດສາຫະກໍາ, ເຂດອຸດສາຫະກໍາຕົ້ນຕໍ, ອຸດສາຫະກໍາ ແລະ ການຄ້າ ຕາມພາກ.
- ການສ້າງສະພາບແວດລ້ອມທີ່ເອື້ອອໍານວຍ ແລະ ສ້າງຄວາມເຂັ້ມແຂງໃຫ້ແກ່ພາກທຸລກິດແມ່ນສຸມໃສ່ການຄຸ້ມຄອງວິສາຫະກິດ, ການສ້າງຖານຂໍ້ມູນ ແລະ ພັດທະນາອຸດສາຫະກໍາ ໃຫ້ເປັນລະບົບທັນສະໄໝ; ສ້າງສະພາບແວດລ້ອມທີ່ເອື້ອອຳນວຍ ແລະ ຄວາມເຂັ້ມແຂງໃຫ້ແກ່ພາກທຸລະກິດ; ການປົກປ້ອງຜູ້ຊົມໃຊ້, ພັດທະນາສົ່ງເສີມ ດ້ານພື້ນຖານໂຄງລ່າງ; ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ເຮັດໃຫ້ຈໍານວນຜູ້ປະກອບກິດຈະການວິສາຫະກິດຂະໜາດນ້ອຍ ແລະ ກາງ ໃຫ້ເພີ່ມຂຶ້ນໃນລະດັບ 2% ຕໍ່ປີ; ສົ່ງເສີມການແຂ່ງຂັນທາງດ້ານການຄ້າ; ຄຸ້ມຄອງ ແລະ ດັດສົມໂຮງງານ; ຄຸ້ມຄອງມາດຕະຖານ, ການວັດແທກ ແລະ ຄຸນນະພາບ, ພ້ອມຄຸ້ມຄອງ ແລະ ສົ່ງເສີມການປົກປ້ອງຊັບສິນທາງປັນຍາ; ເນັ້ນໜັກການກວດກາການຄ້າ.
- ການສົ່ງເສີມ ແລະ ພັດທະນາການຄ້າໃຫ້ກ້າວທັນ ກັບ ສະພາບການໃໝ່ແມ່ນສຸມໃສ່ສ້າງຖານຂໍ້ມູນ, ຂໍ້ມູນສະຖິຕິ ແລະ ພັດທະນາລະບົບການຄ້າ ທີ່ທັນສະໄໝ ດ້ວຍລະບົບ Eletronic ແລະ ນະວັດຕະກໍາໃໝ່ໆ, ຄົ້ນຄ້ວາ, ປັບປູງບັນດານິຕິກຳ ລະບຽບການຕ່າງໆ, ວິເຄາະ-ວິໄຈ ຄຸ້ມຄອງ ລາຄາສິນຄ້າ, ຄຸ້ມຄອງການນຳເຂົ້າ ແລະ ສົ່ງອອກ.
- ການເພີ່ມປະສິດທິພາບການຄຸ້ມຄອງມະຫາພາກ ແລະ ການແບ່ງຂັ້ນຄຸ້ມຄອງກັບທ້ອງຖິ່ນການ, ນໍາພາ ການຈັດຕັ້ງທຸລະກິດ ແລະ ຫົວໜ່ວຍທຸລະກິດທີ່ຂຶ້ນກັບອົງຄະນະພັກກະຊວງ ແມ່ນຈະໄດ້ສຸມໃສ່ຄົ້ນຄວ້າ ຜັນຂະຫຍາຍແນວທາງ, ແຜນການ, ມະຕິຂອງລັດຖະບານ ແລະ ສະພາແຫ່ງຊາດ ທີ່ກ່ຽວຂ້ອງ, ສ້າງແຜນການລົງທຶນ, ແຜນການຮ່ວມມື, ສັງລວມ, ວິເຄາະ ແລະ ການສະໜອງຂໍ້ມູນສະຖິຕິ; ປັບປຸງປະສິດທິພາບການດໍາເນີນງານ ຂອງຂະແໜງ ອຄ; ພັດທະນາຂີດຄວາມສາມາດຂອງບຸກຄະລາກອນ ຂອງຂະແໜງ ອຄ, ປັບປຸງກົງຈັກການຈັດຕັ້ງ ແລະ ການບໍລິຫານ ພ້ອມທັງປະຕິບັດວຽກງານ 3 ສ້າງ ຂອງຂະແໜງ ອຄ ໃຫ້ມີປະສິດທິຜົນ; ສຸມໃສ່ຄົ້ນຄວ້າວິທະຍາສາດ-ວິທະຍາການ ແລະ ການພັດທະນາວິທະຍາໄລການຄ້າ; ປັບປຸງ ແລະ ພັດທະນາລັດວິດສາຫະກິດ ຂອງຂະແໜງ ອຄ; ສົ່ງເສີມ ແລະ ບໍລິການ ຂອງສະພາການຄ້າ ແລະ ອຸດສາຫະກໍາ ແຫ່ງຊາດລາວ ແລະ ສຸມໃສ່ການກວດກາລັດ.ຄາດໝາຍສູ້ຊົນຕົ້ນຕໍຮອດປີ 2025 ແມ່ນ: ລະດັບການເປີດຕົວຂອງການຄ້າ(ມູນຄ່າການຄ້າສິນຄ້າ ແລະ ບໍລິການຕໍ່ GDP ບໍ່ຫຼຸດ 80%), ການສົ່ງອອກສິນຄ້າອຸດສາຫະກຳກວມ 50%, ເຮັດໃຫ້ຂະແໜງ ອຸດສາຫະກຳປຸງແຕ່ງ ແລະ ການຄ້າປະກອບສ່ວນໃນການສ້າງ GDP ຂອງປະເທດໃຫ້ໄດ້ 22-23%, ແລະ ວິສາຫະກິດຂະໜາດນ້ອຍ ແລະ ກາງ ປະກອບ ສ່ວນຕໍ່ GDP 18% ຕໍ່ປີ. ຈໍານວນຜູ້ປະກອບກິດຈະການວິສາຫະກິດຂະໜາດນ້ອຍ ແລະ ກາງ ໃຫ້ເພີ່ມຂຶ້ນ 2% ຕໍ່ປີ. ຈາກນັ້ນກອງປະຊຸມກໍ່ໄດ້ຜານບົດສໍາຫຼວດການນໍາພາລວມ ຂອງ ຄະນະບໍລິຫານງານພັກກະຊວງອຸດສາຫະກໍາ ແລະ ການຄ້າສະໄໝທີ IV ຕໍ່ກອງປະຊຸມໃຫຍ່ຜູ້ແທນອົງຄະນະພັກກະຊວງ ຄັ້ງທີ V ແລະ ປ່ອນບັດຄັດເລືອກເອົາຄະນະບໍລິຫານງານພັກກະຊວງອຸດສາຫະກໍາ ແລະ ການຄ້າຊຸດໃໝ່.
ໃນຕອນທ້າຍ ຂອງກອງປະຊຸມ ຈະໄດ້ເປັນກຽດຮັບຟັງການໃຫ້ຄໍາໂອ້ລົມ ແລະ ທິດຊີ້ນໍາ ຂອງ ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກຜູ້ປະຈໍາການຄະນະເລຂາທິການສູນກາງພັກຮອງປະທານປະເທດ. ກອງປະຊຸມໃຫຍ່ຄະນະບໍລິຫານງານພັກ ກະຊວງອຸດສາຫະກຳ ແລະ ການຄ້າ ຄັ້ງທີ V ຈະດໍາເນີນເປັນເວລາ 1 ວັນເຄີ່ງ.
ຂ່າວ-ພາບ : ຈາກ ກົມແຜນການ ແລະ ການຮ່ວມມື
ກະຊວງອຸດສາຫະກໍາ ແລະ ການຄ້າ
