ໃນວັນທີ 17 ພະຈິກ 2021 ທີ່ໂຮງແຮມຄຣາວພລາຊ່າ, ນະຄອນຫຼວງວຽງຈັນ ກົມມາດຕະຖານ ແລະ ວັດແທກ, ກະຊວງອຸດສະຫະກຳ ແລະ ການຄ້າ ໄດ້ມີການຈັດກອງປະຊຸມຝຶກອົບຮົມກ່ຽວກັບ ການຈັດຕັ້ງປະຕິບັດມາດຕະຖານ ISO14001:2015 ວ່າດ້ວຍລະບົບການບໍລິຫານຄຸ້ມຄອງສິ່ງແວດລ້ອມ, ໃຫ້ກຽດເປີດພິທີກອງປະຊຸມຝຶກອົບຮົມໂດຍ ທ່ານວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ກະຊວງອຸດສະຫະກຳ ແລະ ການຄ້າ, ພ້ອມດຽວກັນນັ້ນກໍຍັງໄດ້ຮັບກຽດເປັນປະທານຮ່ວມໂດຍ ທ່ານນາງ ຂັນແກ້ວ ມູນວົງ ຜູ້ປະສານງານໂຄງການ ARISE PLUS Lao PDR/ITC, ພ້ອມດ້ວຍຜູ້ເຂົ້າຮ່ວມຈາກທັງພາກລັດ ແລະ ເອກະຊົນທີ່ກ່ຽວຂ້ອງ.
ກອງປະຊຸມຝຶກອົບຮົມຄັ້ງນີ້ໄດ້ດຳເນີນເປັນເວລາ 1 ວັນ ເຊິ່ງມີຜູ້ເຂົ້າຮ່ວມທັງໝົດ 55 ທ່ານ ຈາກບັນດາຜູ້ມີສ່ວນຮ່ວມທັງພາກລັດ ແລະ ເອກະຊົນ ໂດຍມີຈຸດປະສົງເພື່ອເປັນການເຜີຍແຜ່ ແລະ ສ້າງຄວາມເຂັ້ມແຂງທາງດ້ານວິຊາການ, ຍົກລະດັບຄວາມຮູ້ຄວາມສາມາດໃຫ້ແກ່ພະນັກງານຂະແໜງການທີ່ກ່ຽວຂ້ອງ ເພື່ອນຳເອົາຄວາມຮູ້ກ່ຽວກັບວຽກງານການບໍລິຫານຄຸ້ມຄອງສິ່ງແວດລ້ອມໄປໝູນໃຊ້ໃນວຽກງານຕົວຈິງຂອງຕົນໃຫ້ມີປະສິດທິພາບ ແລະ ປະສິດທິຜົນສອດຄ່ອງກັບມາດຕະຖານສາກົນ ISO14001:2015. ກອງປະຊຸມຝຶກອົບຮົມດັ່ງກ່າວໄດ້ຮັບການບັນຍາຍໂດຍບັນດານັກສຳມະນາກອນທີ່ມີຄວາມຮູ້ ແລະ ຊ່ຽວຊານຈາກໂຄງການຊ່ວຍເຫຼືອວຽກງານການຄ້າຂອງສະຫະພາບເອີຮົບ ແກ່ ສປປ ລາວ ພາຍໃຕ້ແຜນງານເຊື່ອມໂຍງອາຊຽນ-ARISE PLUS, ທັງນີ້ເພື່ອເປັນການສົ່ງເສີມບົດບາດຄວາມສຳຄັນຂອງການຄຸ້ມຄອງສິ່ງແວດລ້ອມໃຫ້ເຂົ້າເຖິງທຸກຂົງເຂດວຽກງານ ແນໃສ່ຮັບປະກັນຄວາມປອດໄພຕໍ່ຊີວິດ, ສັງຄົມ ແລະ ສິ່ງແວດລ້ອມ ແທດເໝາະກັບແນວທາງນະໂຍບາຍການພັດທະນາແບບຍືນຍົງ.
ເວົ້າລວມແລ້ວວຽກງານການຄຸ້ມຄອງສິ່ງແວດລ້ອມແມ່ນມີບົດບາດສຳຄັນໃນເວທີສາກົນຄຽງຄູ່ກັບການເຕີບໃຫຍ່ຂະຫຍາຍຕົວທາງດ້ານເສດຖະກິດ ແລະ ສັງຄົມ ເນື່ອງຈາກຜົນກະທົບທາງສິ່ງແວດລ້ອມຫຼາກຫຼາຍຮູບແບບແມ່ນສົ່ງຜົນທາງກົງ ແລະ ທາງອ້ອມຕໍ່ຂະບວນການພັດທະນາ. ສະນັ້ນ, ຫຼາຍປະເທດຈຶ່ງໃຫ້ຄວາມສຳຄັນ ແລະ ສົ່ງເສີມວຽກງານການບໍລິຫານຄຸ້ມຄອງສິ່ງແວດລ້ອມເຂົ້າໃນທຸກຂົງເຂດວຽກງານແນໃສ່ຫຼຸດຜ່ອນຜົນກະທົບທາງດ້ານລົບຕໍ່ຊີວິດ, ສັງຄົມ ແລະ ການພັດທະນາອີກດ້ວຍ.
ບົດຂ່າວ ແລະ ຮູບພາບ: ລັດດາ ພິມມະຈັກ