ໃນຕອນເຊົ້າຂອງວັນທີ 16 ພະຈິກ 2021 ທີ່ຜ່ານມານີ້ ທາງຫ້ອງກວດສອບ ແລະ ຢັ້ງຢືນຄຸນນະພາບອຸປະກອນພິເສດ, ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ໄດ້ມີການລົງຕິດຕາມກວດສອບຄຸນນະພາບອຸປະກອນພິເສດ ປະເພດເຄນຍົກ ຈຳນວນ 2 ເຄື່ອງ ຂອງເຂື່ອນໄຟຟ້ານ້ຳເທີນ 1 ຈຳກັດ ເຊິ່ງຕັ້ງຢູ່ບ້ານໂພນງາມ, ເມືອງ ປາກກະດິງ ແຂວງ ບໍລິຄຳໄຊ.
ໃນການລົງຕິດຕາມກວດສອບຄຸນນະພາບອຸປະກອນພິເສດ ປະເພດເຄນຍົກ ໃນຄັ້ງນີ້ແມ່ນອີງຕາມລະບຽບ ກ່ຽວກັບການຄຸ້ມຄອງຄຸນນະພາບ ແລະ ຄວາມປອດໄພ ອຸປະກອນພິເສດ ທີ່ຜະລິດ, ນໍາເຂົ້າ, ນຳໃຊ້, ດໍາເນີນການຕິດຕັ້ງ, ປັບແກ້ ແລະ ສ້ອມແປງ ອຸປະກອນພິເສດ ຢູ່ ສປປ ລາວ ບົນພື້ນຖານຄວາມຖືກຕ້ອງຕາມລະບຽບຫຼັກການ, ກົດໝາຍ ແລະ ມາດຕະຖານແຫ່ງຊາດ ໂດຍສອດຄ່ອງກັບລະບຽບການຂອງພາກພື້ນ ແລະ ສາກົນ ແນໃສ່ໃນການຕິດຕາມ, ຊຸກຍູ້, ສົ່ງເສີມ ໃຫ້ອຸປະກອນພິເສດມີຄຸນນະພາບ ເພື່ອຮັບປະກັນຄວາມປອດໄພຕໍ່ຜູ້ຊົມໃຊ້, ປົກປັກຮັກສາຊີວິດ, ຊັບສິນ ແລະ ສິ່ງແວດລ້ອມ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ພາຍຫຼັງໄດ້ກວດສອບທາງດ້ານເຕັກນິກສຳເລັດ ທີ່ຖືກຕ້ອງ ແລະ ສອດຄ່ອງຕາມມາດຕະຖານ ທາງກົມມາດຕະຖານ ແລະ ວັດແທກ ຈະໄດ້ອອກໃບຢັ້ງຢືນຄຸນນະພາບ ແລະ ເຄື່ອງໝາຍນໍາໃຊ້ ໃຫ້ແກ່ອຸປະກອນດັ່ງກ່າວ.
