ໃນຕອນບ່າຍຂອງວັນທີ 31 ມີນາ 2022 ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ຮ່ວມກັບ ສະພາການຄ້າ ແລະ ອຸດສາຫະກຳແຫ່ງຊາດ ແລະ ສູນການຄ້າສາກົນ ITC ໂດຍຜ່ານໂຄງການ ARISE PLUS LAO ໂດຍໃຫ້ກຽດເປັນປະທານເປີດກອງປະຊຸມເຜີຍແຜ່ ໂດຍ ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ ແລະ ປະທານຮ່ວມ ໂດຍ ທ່ານ ທະນົງສີນ ກັນລະຍາ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ, ດັ່ງທີ່ພວກເຮົາຮູ້ນຳກັນຢູ່ໃນລະດັບພາກພື້ນ ແລະ ລະດັບສາກົນ, ບັນດາມາດຕະຖານກາຍເປັນເສົາຄໍ້າອັນໃໝ່ສໍາລັບລະບົບການຄ້າສາກົນອັນໃໝ່. ໃນເມື່ອສິ່ງກີດຂວາງທາງການຄ້າ ແລະ ການລົງທຶນຖືກລຶບລ້າງ ແລະ ເຕັກໂນໂລຊີຂໍ້ມູນຂ່າວສານຍັງຄົງສືບຕໍ່ພັດທະນາ, ການຫັນໃຫ້ເປັນມາດຕະຖານ ກໍ່ນັບມື້ນັບມີບົດບາດສໍາຄັນເພີ່ມຂຶ້ນໃນເວທີສາກົນ. ເຊິ່ງຜ່ານການເຄື່ອນໄຫວວຽກງານໃນໄລຍະທີ່ຜ່ານມາ ເຫັນວ່າມີຄວາມຈຳເປັນທີ່ຈະຕ້ອງເພີ່ມທະວີ ແລະ ສ້າງຄວາມເຂົ້າໃຈໃຫ້ແກ່ບັນດາບໍລິສັດ, ຜູ້ປະກອບການ, ຜູ້ຜະລິດສິນຄ້າ ທີ່ສົນໃຈການສົ່ງສິນຄ້າຂອງຕົນເອງອອກສູ່ຕະຫຼາດຕ່າງປະເທດ ເຊິ່ງຈຳເປັນຈະຕ້ອງໄດ້ຮູ້ກ່ຽວກັບບັນດາ ມາດຕະຖານ, ລະບຽບການເຕັກນິກ ແລະ ຂັ້ນຕອນການປະເມີນຄວາມສອດຄ່ອງ ຂອງປະເທດທີ່ຈະສົ່ງອອກ ລວມທັງ ສິນຄ້າທີ່ຈະນຳເຂົ້າມາເພື່ອຮັບໃຊ້ຜູ້ບໍລິໂພກພາຍໃນກໍ່ຈຳເປັນຈະຕ້ອງໄດ້ຮູ້ເຊັ່ນກັນ, ເພື່ອຂະຫຍາຍການຈັດຕັ້ງປະຕິບັດ ແລະ ສ້າງຈິດສຳນືກໃຫ້ສັງຄົມເຂົ້າໃຈຢ່າງເລິກເຊິ່ງ ໂດຍສະເພາະແມ່ນ ໜ່ວຍງານຈັດຕັ້ງປະຕິບັດ, ຜູ້ປະກອບການ, ຜູ້ຜະລິດສິນຄ້າ ເພື່ອປົກປ້ອງ ສິດຜົນປະໂຫຍດ, ຄວາມປອດໄພດ້ານສຸຂະພາບ, ສຸຂະນາໄມ ແລະ ສິ່ງແວດລ້ອມຂອງປະຊາຊົນ. ສະນັ້ນຈຸດປະສົງຂອງກອງປະຊຸມເຜີຍແຜ່ນີ້ເພື່ອສ້າງຄວາມເຂັ້ມແຂງ ແລະ ສ້າງຄວາມເຂົ້າໃຈຢ່າງເລິກເຊິ່ງກ່ຽວກັບວຽກງານ TBT/SPS ປະຈຸບັນ ຢູ່ ສປປ ລາວ ເຊິ່ງເປັນໂອກາດອັນດີທີ່ສ້າງຄວາມເຂົ້າໃຈໃຫ້ແກ່ບັນດາຜູ້ປະກອບການ, ບໍລິສັດ ແລະ ພາກທຸລະກິດ SMEs ກ່ຽວກັບວຽກງານດັ່ງກ່າວໃຫ້ເລີກເຊິ່ງຍິງຂື້ນ.
