ໃນວັນທີ 28 ກໍລະກົດ 2022 ກົມມາດຕະຖານ ແລະ ວັດແທກ, ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມປຶກສາຫາລືກ່ຽວກັບການຄຸ້ມຄອງ, ກວດ ແລະ ຢັ້ງຢືນມາດຕະຖານມາດຕະຖານແຫ່ງຊາດ ໃຫ້ແກ່ຜະລິດຕະພັນເຫຼັກເສັ້ນ ແລະ ເຫຼັກໂຄງສ້າງຮູບປະພັນ ຢູ່ທີ່ຫ້ອງປະຊຸມຊັ້ນ 02 ຂອງກົມມາດຕະຖານ ແລະ ວັດແທກ ໂດຍການເປັນປະທານ ຂອງ ທ່ານ ວຽງຄໍາ ສິງສອນໄຊ ຮອງຫົວໜ້າກົມມາດຕະຖານ ແລະ ວັດແທກ.
ໃນຊຸມປີທີ່ຜ່ານມາ, ການກວດກາ, ກວດສອບ ແລະ ຢັ້ງຢືນຄຸນນະພາບ ຜະລິດດຕະພັນສິນຄ້າ ເປັນວຽກງານໜຶ່ງທີ່ມີຄວາມຈຳເປັນໃນສະພາບປະຈຸບັນ. ບັນດາປະເທດໃນອາຊຽນ, ພາກພື້ນ ກໍຄືສາກົນ ໄດ້ຖືຄວາມສຳຄັນ ແລະ ເອົາໃຈໃສ່ການຈັດຕັ້ງປະຕິບັດ ວຽກງານດັ່ງກ່າວ ເປັນທີ່ຍອມຮັບ ແລະ ຮັບຮູ້ຕັ້ງແຕ່ໃດມາ ແລະ ປະຈຸບັນນີ້ ສປປ ລາວ ເຮົາກໍ່ໄດ້ເຂົ້າເປັນສະມາຊິກຂອງ ອົງການການຄ້າໂລກ (WTO) ແລະ ເປັນ ສະມາຊິກຂອງປະຊາຄົມເສດຖະກິດອາຊຽນ (AEC) ສະນັ້ນ, ອັດຕາພາສີທີ່ເປັນກໍາແພງທາງດ້ານການຄ້າ ເລີ່ມຫຼຸດນ້ອຍຖອຍລົງ ເຮັດໃຫ້ຫລາຍປະເທດໃນໂລກຫັນມານໍາໃຊ້ມາດຕະຖານ ເປັນມາດຕະການຫຼັກ ໃນການຄຸ້ມຄອງການນໍາເຂົ້າຜະລິດຕະພັນສິນຄ້າຈາກຕ່າງປເທດ ເພື່ອເປັນການປົກປ້ອງຜະລິດຕະພັນພາຍໃນ ແລະ ຜູ້ຊົມໃຊ້ ດັ່ງນັ້ນ, ຍ້ອນເຫັນໄດ້ຄວາມສໍາຄັນຂອງວຽກງານດັ່ງກ່າວ ການນໍາຂອງກະຊວງຈຶ່ງໄດ້ມີທິດຊີ້ນໍາໃຫ້ຊຸກຍູ້ສົ່ງເສີມບັນດາຜະລິດຕະພັນພາຍໃນໃຫ້ມີຄຸນນະພາບ ແລະ ສອດຄ່ອງຕາມມາດຕະຖານ ພ້ອມທັງປະກາດເປັນມາດຕະຖານບັງຄັບ ສໍາລັບຜະລິດຕະພັນທີ່ພົວພັນເຖິງ ການປ້ອງກັນຄວາມສະງົບ, ຄວາມປອດໄພ, ສຸຂະອານາໄມ ແລະ ສິ່ງ ແວດລ້ອມ ແລະ ອື່ນໆ.
ຈຸດປະສົງໃນການຈັດກອງປະຊຸມເຜີຍແຜ່ໃນຄັ້ງນີ້ : ກໍເພື່ອສ້າງຄວາມຮູ້, ຄວາມເຂົ້າໃຈ ພ້ອມທັງເປັນການຊຸກຍູ້ສົ່ງເສີມໃຫ້ບັນດາຜະລິດຕະພັນ ເຫຼັກເສັ້ນ ແລະ ເຫຼັກໂຄງສ້າງຮູບປະພັນ ທີ່ຜະລິດ ຢູ່ ສປປ ລາວ ເພື່ອໃຫ້ສາມາດແຂ່ງກັບຜະລິດຕະພັນທີ່ນໍາເຂົ້າຈາກຕ່າງປະເທດ ໃຫ້ແກ່ຜູ້ປະກອບການ ບົນພື້ນຖານຕ່າງຝ່າຍຕ່າງມີຜົນປະໂຫຍດຮ່ວມກັນ. ໃນນາມອົງການທີ່ຄຸ້ມຄອງ, ກວດກາຄຸນນະພາບ, ມາດຕະຖານ ແລະ ວັດແທກ ຂ້າພະເຈົ້າ ຕາງໜ້າໃຫ້ກົມພ້ອມແລ້ວທີ່ຈະໃຫ້ການຊ່ວຍເຫຼື່ອແກ່ບັນດາທ່ານ ແລະ ຈະຍົກສູງຄວາມຮັບຜິດຊອບ ດໍາເນີນວຽກງານດັ່ງກ່າວນີ້ດ້ວຍຄວາມໂປ່ງໃສ, ວ່ອງໄວ ແລະ ບໍລິການຮັບໃຊ້ສັງຄົມໃຫ້ມີປະສິດທິພາບສູງ ພ້ອມນີ້ ຂໍຮຽກຮ້ອງມາຍັງບັນດາຂະແໜງການພາກລັດ, ພາກເອກະຊົນ, ບັນດາຜູ້ປະກອບການ, ບໍລິສັດ ແລະ ປະຊາຊົນຜູ້ຊົມໃຊ້ໃນຂອບເຂດທົ່ວປະເທດ ຈົ່ງໃຫ້ຄວາມຮ່ວມມື ແລະ ຊຸກຍູ້ການປະຕິບັດວຽກງານ ມາດຕະຖານ ແລະ ວັດແທກ ໃຫ້ມີໝາກຜົນ ເພື່ອປະກອບສ່ວນສ້າງສາ ແລະ ພັດທະນາເສດຖະກິດ-ສັງຄົມ ຂອງປະເທດເຮົາ, ເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມສາມັກຄີປອງດອງ, ປະຊາທິປະໄຕ, ຍຸດຕິທໍາ ແລະ ສີວິໄລ.
